Oʻzbekiston tashqi ishlar vaziri Baxtiyor Saidov Tokioda Yaponiyaning Onodera User Run kompaniyasi prezidenti Jun Kato bilan uchrashdi. Bu haqda vazir oʻzining Telegram-kanalida maʼlum qildi.
Onodera User Run xorijiy kadrlarni tayyorlash, tanlash va ishga joylashtirishga ixtisoslashgan kompaniya hisoblanadi.
Uchrashuvda kompaniyaning Oʻzbekiston fuqarolarini Yaponiyada ish bilan taʼminlashga qaratilgan loyihalari muhokama qilindi. Baxtiyor Saidov Oʻzbekiston tomoni ushbu tashabbuslarni qoʻllab-quvvatlashini bildirdi.
Shuningdek, Oʻzbekistonning boshqa hududlarida ham yangi taʼlim markazlarini tashkil etish va yoshlarni kasbiy tayyorlash koʻlamini kengaytirish masalalari koʻrib chiqildi.
TIV rahbariga koʻra, Oʻzbekiston tomoni Yaponiya bilan kadrlar tayyorlash, aholi bandligini taʼminlash va investitsiyalar sohalaridagi hamkorlikni yangi oʻzaro manfaatli loyihalar bilan kengaytirishga tayyor.
