Oʻzbekiston va AQSH Oy, Mars, kometalar va asteroidlarni tinchlik maqsadlarida foydalanish hamda tadqiq etish boʻyicha hamkorlik tamoyillarini belgilovchi «Artemida» bitimlarini imzoladi, deya xabar berdi tashqi ishlar vaziri Baxtiyor Saidov.
Taʼkidlanishicha, hujjat Oʻzbekistonning NASA va boshqa ishtirokchi davlatlar kosmik agentliklari bilan hamkorligini kengaytirish, milliy kadrlarni tayyorlash hamda kosmik texnologiyalar transferi uchun yangi imkoniyatlar yaratadi.
Oʻzbekiston «Artemida» kelishuvlarini imzolagan 77-davlat boʻldi.
AQSH davlat kotibi Marko Rubio ham ijtimoiy tarmoqdagi sahifasida Oʻzbekiston tashqi ishlar vaziri Baxtiyor Saidov bilan muzokaralar oʻtkazgani haqida xabar yozib qoldirdi.
Tomonlar AQSH va Oʻzbekiston oʻrtasidagi strategik hamkorlikni, jumladan, infratuzilma, koinot, muhim minerallar va C5+1 diplomatik platformasi orqali hamkorlikni chuqurlashtirishni muhokama qilishgan.
«Biz mamlakatlarimiz va mintaqamiz farovonligini taʼminlash yoʻlida birgalikda harakat qilmoqdamiz», – deya yozadi Rubio.
