Bosh prokuratura huzuridagi departamentning Boyovut tumani bo‘limi hamda boshqa huquqni muhofaza qiluvchi organlar xodimlari tomonidan o‘tkazilgan tezkor tadbirda “Sirdaryo suv ta’minoti” aksiyadorlik jamiyatining Boyovut tumani filiali boshlig‘i U.U. va filialning avariya-ta’mirlash xizmati bo‘linmasi brigadiri A.P. qo‘lga olindi.
Tergov ma’lumotlariga ko‘ra, ular o‘zaro til biriktirib, fuqaro D.O.ning avval sotilgan xonadoniga tegishli ichimlik suvidan 3,5 million so‘mlik qarzdorlikni 1,8 million so‘m evaziga yo‘q qilib berishni va’da qilgan.
Tezkor tadbir davomida filial boshlig‘i xizmat xonasida kelishilgan 1,8 million so‘mni olgan vaqtida gumonlanuvchilar ashyoviy dalillar bilan ushlangan. Ma’lum qilinishicha, brigadir A.P. muqaddam sudlangan.
Mazkur holat yuzasidan Jinoyat kodeksining 210-moddasi (pora olish) bilan jinoyat ishi qo‘zg‘atilgan. Ayni paytda tergov harakatlari olib borilmoqda.
