Ukraina dronlari 2 avgustga o‘tar kechasi Wildberries kompaniyasining Samara oblasti Krasnoyarsk rayoni Novosemeykino posyolkasidagi omboriga hujum uyushtirdi. Omborga hujum qilingani haqida gubernator Vyacheslav Fedorishchev xabar berdi, uning ma’lumotiga ko‘ra, hujum oqibatida qurbonlar bo‘lmagan. U bu hujumni «dushmanning navbatdagi terrorchilik akti» deb atadi. Kompaniya matbuot xizmati ham hujum faktini tasdiqlab, jabrlanganlar yo‘qligini ma’lum qilgan va logistik zanjir qayta yo‘lga qo‘yilganini qo‘shimcha qilgan.
Dronlar zarbasidan keyin ombor yonib ketgan. Guvohlar 63.ru nashri muxbiriga aytib berishicha, hujum ertalabki soat sakkiz atrofida smena almashish vaqtida ro‘y bergan. «Endigina ish boshlagandik. Qattiq ovoz eshitildi. Sirenalar ovozi chalingach, bu evakuatsiya ekanini tushundik. Barcha qocha boshladi va shu vaqtda yana bir zarba kelib tushdi. Har tomonga tarqaldik. O‘tloqqa borib o‘tirdik. Darhol yana bir dron uchib keldi. Hamma o‘rnidan turib qocha boshladi», – degan shu kuni omborda navbatchilikda bo‘lgan xodimlardan biri.
Logistik markazning voqea joyiga bir necha soatdan keyin, soat taxminan 12 lar atrofida kelgan boshqa bir ishchisi esa «ombor yer bilan bitta bo‘lgani» va «hamon yonayotgani»ni aytib bergan.
Samara oblasti gubernatori Krasnoyarsk rayoni aholisini omborga hujumdan so‘ng «havoda zararli mahsulotlar paydo bo‘lgani» tufayli «salomatlikka e’tibor qaratish»ni so‘ragan.
Ukraina qurolli kuchlari Pilotsiz tizimlar kuchlari qo‘mondoni Robert Brovdi («Major» laqabli) Wildberries’ning Samara oblastidagi ombori Rossiyaning Yevropa qismi hamda Sibir o‘rtasidagi «asosiy ko‘prik» bo‘lganini aytib, «bu so‘nggi zarba emasligi aniqligi»ni ta’kidlagan.
18 iyuldan buyon ukrain dronlari Wildberries’ning Rossiya bo‘ylab jami 16 ta omboriga zarba berdi, jumladan, front chizig‘idan ancha olisda bo‘lgan hududlarga ham ukrain dronlari uchib kelmoqda. Samara oblastidagi ombor kompaniyaning hujumga uchragan 17-ob’yekti bo‘ldi.
2 avgustga o‘tar kechasi Saratov oblasti ham hujumga uchragan. Ukrainadagi telegram-kanallarga ko‘ra, Saratov neftni qayta ishlash zavodi («Rosneft» tarkibiga kiradi), shuningdek, «Engels-2» harbiy aerodromi nishonga aylangan.
Hudud gubernatori Roman Busarginga ko‘ra, hujum oqibatida ikki kishi halok bo‘lgan. Uning qo‘shimcha qilishicha Engelsdagi ko‘p kvartirali uy shikastlangan.
Astra telegram-kanal tasdiqlashicha, Saratovda Tulskaya ko‘chasidagi yana bir ko‘p qavatli uyga zarba berilgan. U hujumga uchragan neftni qayta ishlash zavodidan taxminan uch kilometr masofada joylashgan.
Ukraina qurolli kuchlari Bosh shtabi Ukraina 2 avgustga o‘tar kechasi Volgabo‘yidagi eng yirik neft ob’yektlaridan biri bo‘lgan Saratov neftni qayta ishlash zavodi hamda Rossiya strategik aviatsiyasining asosiy bazalaridan biri bo‘lgan Engels harbiy aerodromini aniq nishonga olgani haqida bayonot bergan. Bundan tashqari, Kaluga oblastidagi «Lyudinovskaya» neft bazasiga, shuningdek, Brayansk oblastidagi dronlarni saqlash, tayyorlash va uchirish markaziga zarba berilgan.
Rossiya mudofaa vazirligi tun davomida havo hujumidan mudofaa kuchlari Rossiyaning 15 ta oblastida, shuningdek, anneksiya qilingan Qrim hamda Azov va Qora dengiz akvatoriyalarida ukrainlarning 635 ta droni to‘xtatilgani va yo‘q qilingani haqida bayonot bergan.
Keyinroq Boshqirdiston rahbari Radiy Xabirov ham Ukraina dronlari hujumi haqida ma’lum qildi. Uning so‘zlariga ko‘ra, dronlardan biri Ufa sanoat zonasi ustida urib tushirilgan va yong‘in boshlangan. Biroq Xabirov hech qanday tafsilotlarni keltirmagan. Astra telegram-kanali guvohlarning fotosuratlari va videolarini o‘rgangan holda Ukraina dronlari Ufadagi «Bashneft-UNPZ» neftni qayta ishlash zavodiga zarba berganini da’vo qilmoqda. Boshqa ikkita korxona, «Bashneft-Novoyl» va «Bashneft-Ufanneftexim» bilan birgalikda bu neftni qayta ishlash zavodi Rossiyadagi eng yiriklaridan biri bo‘lgan Ufa neftni qayta ishlash kompleksini tashkil etadi («Rosneft» tarkibiga kiradi). Bir kun avval Ukraina xavfsizlik xizmati 1 avgustga o‘tar kechasi Ufadagi uchta neftni qayta ishlash zavodiga muvaffaqiyatli zarbalar berilganini ma’lum qilgandi.
Bundan tashqari, ukrain dronlari Udmurtiyaga ham hujum qilgan. Region rahbari Olga Abramova xabar qilishicha, region shimolida fuqarolik avtomobili zarba ostida qolgan. Uch kishi halok bo‘lgan. Yana ikki kishi, jumladan, bir bola shifoxonaga yotqizilgan.
Ukraina qurolli kuchlari Bosh shtabi Boshqirdiston va Udmurtiyaga hujum yuzasidan izoh bermagan. Saratovdagi neftni qayta ishlash zavodi hamda Engelsdagi aerodromga qilingan hujumlar haqida xabar bergan Volodimir Zelenskiyning bayonotida ham bu hududlar tilga olinmagan.
