Sharifa Salimova o‘zbek she’riyatida vatanga muhabbat, milliy g‘urur, vafo, sadoqat, matonat va jasorat kabi yuksak insoniy fazilatlarni tarannum etgan ijodkor sifatida keng e’tirof etilgan. Shuningdek, u oila, yoshlar tarbiyasi va jamiyat hayotidagi dolzarb ma’naviy-ma’rifiy masalalarga bag‘ishlangan ko‘plab she’riy va publitsistik asarlar muallifi edi.
Shoira adabiyot maydoniga o‘tgan asrning 70-yillarida kirib kelgan bo‘lib, «Hayot zavqi», «Mening bahorim», «Xizr bulog‘i», «Yetti oqqush», «Vatan suvrati», «Vafoning iffat yo‘li», «Bedor tun tomchilari» kabi asarlari bilan kitobxonlar mehrini qozongan.
U mashhur xonanda va bastakorlar bilan hamkorlikda yaratgan «Qaddingni tik tut, ayol!», «Vatan», «Ona nidosi», «Onajon tilim», «Sendan bir dam ayro tushmaymiz, Vatan!» kabi qo‘shiqlar ham milliy san’atimiz xazinasidan munosib o‘rin olgan.
So‘nggi yillarda og‘ir xastalikni boshidan kechirganiga qaramay, Sharifa Salimova ijoddan to‘xtamadi. U 2024-yilda qatag‘on qurboni bo‘lgan o‘zbek ayollari taqdiriga bag‘ishlangan «Qabohat saltanati yoxud qor qo‘ynida lolalar» nomli epik she’riy romanini yaratdi. Mazkur asar o‘zbek adabiyotida ushbu mavzuga bag‘ishlangan ilk yirik manzumalardan biri sifatida e’tirof etildi.
Sharifa Salimova mamlakat ijtimoiy-siyosiy hayotida ham faol ishtirok etgan. U 1999–2009-yillarda Oliy Majlis deputati, Oila va ayollar muammolari komissiyasi raisi sifatida faoliyat yuritgan, shuningdek, O‘zbekiston Yozuvchilar uyushmasida ko‘p yillar davomida yosh ijodkorlarni qo‘llab-quvvatlash va adabiyot targ‘ibotiga munosib hissa qo‘shgan.
Uning adabiyot va madaniyat rivojiga qo‘shgan xizmatlari davlat tomonidan munosib e’tirof etilib, «O‘zbekiston xalq shoiri», «O‘zbekistonda xizmat ko‘rsatgan madaniyat xodimi» faxriy unvonlari hamda «Mehnat shuhrati» ordeni bilan taqdirlangan edi. Sharifa Salimovaning yorqin xotirasi o‘zbek adabiyoti va madaniyati tarixida munosib o‘rin egallaydi.
