O‘zgidromet ma’lumotiga ko‘ra, oy davomida havo harorati keskin o‘zgarib turgan. Iyulning dastlabki kunlarida nisbatan salqin ob-havo kuzatilgan bo‘lsa, ikkinchi besh kunlikdan boshlab harorat izchil ko‘tarilgan.
Eng kuchli issiq to‘lqini 18–19-iyul kunlari kuzatilib, respublikaning katta qismida havo harorati 43–46 darajaga, janubiy va cho‘l hududlarida esa 46–50 darajagacha yetgan. Kuzatilgan ko‘rsatkichlar mamlakat meteorologik kuzatuvlari tarixidagi mutlaq maksimumlarga yaqinlashib, qator hududlarda yangi rekordlar o‘rnatilgan.
Jumladan, Nurafshon, Buxoro, Navoiy, Uchquduq, Samarqand, Kattaqo‘rg‘on, Arnasoy, Shahrisabz, Andijon, Namangan, Farg‘ona va yana bir qator meteostansiyalarda mutlaq maksimal havo harorati bo‘yicha avvalgi rekordlar yangilangan.
Toshkent shahrida eng yuqori harorat 19-iyul kuni qayd etilib, termometrlar 44,3 darajani ko‘rsatgan. Bu 1997-yilda o‘rnatilgan mutlaq rekorddan atigi 0,3 daraja past bo‘lgan.
Hisobotga ko‘ra, iyul oyida havo harorati 40 daraja va undan yuqori bo‘lgan kunlar soni markaziy va sharqiy hududlarda 3–8 kunni, boshqa hududlarda 9–18 kunni, eng janubiy va Qizilqumning ayrim joylarida esa 19–23 kunni tashkil etgan. Bu ko‘rsatkichlar ko‘p yillik o‘rtacha qiymatlardan ancha yuqori bo‘lgan.
