Buyuk Britaniya hukumati saytida e’lon qilingan qo‘shma bayonotda Rossiyaning Abxaziya va Janubiy Osetiyadagi davom etayotgan harbiy ishtiroki xalqaro huquq normalari hamda 2008-yil 12-avgustda imzolangan olti bandli tinchlik kelishuvi bo‘yicha o‘z zimmasiga olgan majburiyatlariga zid ekani ta’kidlangan.
Hujjat mualliflari Rossiya tomonidan Gurjistonning mazkur hududlarini harbiylashtirish mamlakat xavfsizligiga, shuningdek, mintaqaviy va Yevropa barqarorligiga jiddiy tahdid solayotganini qayd etdi.
Bayonotda aytilishicha, Rossiya 2026-yil 9-may kuni Janubiy Osetiyaning de-fakto rahbariyati bilan «ittifoqchilik va integratsiyani chuqurlashtirish to‘g‘risidagi kelishuv»ni imzolash orqali Gurjistonning suvereniteti va hududiy yaxlitligini yanada buzgan.
Shuningdek, Rossiya fuqarosining Janubiy Osetiya rahbari etib tayinlanishi mintaqa to‘liq anneksiya qilinishi mumkinligi haqidagi xavotirlarni kuchaytirgani ta’kidlangan. Bayonot mualliflari bunday harakatlar javobsiz qolmasligini bildirgan.
Britaniya, Germaniya, Fransiya va Italiya Gurjistonning xalqaro miqyosda tan olingan chegaralari doirasidagi suvereniteti va hududiy yaxlitligini to‘liq qo‘llab-quvvatlashini yana bir bor tasdiqladi.
Shu bilan birga, ular Abxaziya va Janubiy Osetiya bilan diplomatik munosabatlar o‘rnatgan davlatlarni Nauru Respublikasi misoliga ergashib, ushbu hududlarning «mustaqilligi»ni tan olish qarorini qayta ko‘rib chiqishga chaqirdi. Bayonotda Nauru o‘z vaqtida mazkur qarorni bekor qilgani qayd etilgan.
