Ichki ishlar vazirligi Markaziy bank bilan hamkorlikda kiberjinoyatlarga qarshi maxsus tizim yaratgan. Bu haqda vazirlikning navbatdagi Hay’at yig‘ilishida aytib o‘tildi.
Vazirlik tizimida 2026-yil “Kiberjinoyatlarga qarshi kurashish yili”, deb e’lon qilingan va ushbu yo‘nalishda profilaktik tadbirlar keskin kuchaytirilgan.
Qayd etilishicha, Markaziy bank bilan hamkorlikda yaratilgan maxsus tizim yo‘lga qo‘yilgani natijasida 29 trln so‘m pul noqonuniy ravishda chetga chiqib ketishining oldi olingan. Shuningdek, 18 838 ta jinoyatga aloqador bank kartalari bloklangan.
6 oyda jami 9 282 ta kiberjinoyat fosh etilgan, 4 011 ta jinoyat tashabbus asosida aniqlangan. Bundan tashqari, 13 ming nafardan ortiq fuqarolarga yetkazilgan 120 mlrd 496 mln so‘mdan ziyod moddiy zarar qaytarilgan.
Yig‘ilishda amalga oshirilayotgan ishlar yetarli emasligi tanqid qilingan. Xususan, ushbu yo‘nalishda fuqarolardan kelib tushayotgan murojaatlarni har tomonlama va puxta o‘rganish, kiberjinoyatlarning sodir etilish sabablari va ularga imkon berayotgan omillarni chuqur tahlil qilish zarurligi ta’kidlangan.
