O‘zbekistonning Novosibirsk shahridagi Bosh konsuli Aslam Akbarov Kuzbass klinik konchilar salomatligini muhofaza qilish markazining neyroxirurgiya bo‘limida davolanayotgan O‘zbekiston fuqarosi B.T. holidan xabar oldi. Bu haqda «Dunyo» axborot agentligi xabar berdi.
Bosh konsul tibbiyot muassasasida bemorning ahvoli bilan tanishib, uni davolayotgan shifokor bilan suhbatlashgan.
Shifokor ma’lumotiga ko‘ra, O‘zbekiston fuqarosi balandlikdan yiqilishi oqibatida to‘rtta umurtqasi, qovurg‘alari, oyoq panjasi va tizzasidan jarohat olgan.
Unga zudlik bilan umurtqa va tizza bo‘g‘imida ikkita jarrohlik amaliyoti o‘tkazilgan. Shuningdek, bemorning harakatlanishini barqarorlashtirish uchun zarur maxsus tibbiy moslamalar o‘rnatilgan.
Hozirda bemorning ahvoli barqaror deb baholanmoqda. Shifokorlarning bildirishicha, uning hayoti uchun xavf mavjud emas.
Shu bilan birga, O‘zbekiston Bosh konsulxonasi hamda Migratsiya agentligining Novosibirskdagi vakolatxonasi hamkorligida vatandoshning davolanishini O‘zbekistonda davom ettirish masalasi hal etilmoqda.
Xususan, uni aviareys orqali Toshkentga yetkazish bo‘yicha tegishli choralar ko‘rilmoqda.
