Ta’kidlanishicha, Tatariston O‘zbekiston tomoniga hodisa va jabrlanganlar haqida ma’lumot olishda hamda halok bo‘lgan O‘zbekiston fuqarolarining jasadini vataniga jo‘natishni tashkil etishda yordam ko‘rsatmoqda.
Xabarga ko‘ra, yordam jarayonini bosh vazirning birinchi o‘rinbosari Rustam Nigmatullin nazorat qilib bormoqda. Halok bo‘lganlarning jasadini vataniga yuborishdan oldin Nijnekamsk masjidlaridan birida janoza namozi o‘qilgan. O‘zbekiston tomoni bilan ishlar respublika rahbari Rustam Minnixanovning topshirig‘i bilan olib borilmoqda.
Eslatib o‘tamiz, 10-avgust kuni Nijnekamsk Ukraina dronlari tomonidan ommaviy hujumga uchragan edi. Oqibatda 78 kishi jabrlandi, 13 kishi, jumladan, bir bola halok bo‘ldi. Tergov qo‘mitasi terakt moddasi bo‘yicha jinoiy ish qo‘zg‘atdi. Tataristonda fojia munosabati bilan motam e’lon qilinib, ko‘ngilochar tadbirlar bekor qilindi va boshqa kunga ko‘chirildi.
Nijnekamskdagi hujumda halok bo‘lganlar orasida O‘zbekiston va Tojikiston fuqarolari ham bor. Toshkentning Qozondagi Bosh konsulxonasi respublikaning yetti nafar fuqarosi halok bo‘lganini ma’lum qildi. Keyinchalik O‘zbekiston FVV ularning soni 8 nafarga yetgani, prezident Shavkat Mirziyoyev topshirig‘iga muvofiq, bosh vazir o‘rinbosari Ochilboy Ramatov boshchiligida hukumat komissiyasi tashkil etilgani haqida xabar bergan edi.
