Vengriya parlamenti hukmron “Tisa” partiyasi tomonidan mamlakat prezidentligiga taklif etilgan Andrash Bakani ushbu lavozimga tasdiqladi. “Telex” xabariga ko‘ra, 73 yoshli sobiq sudyaning nomzodini 140 nafar deputat qo‘llab-quvvatlagan, olti kishi esa qarshi ovoz bergan. Viktor Orbanning “Fides” partiyasi va Xristian-demokratik xalq partiyasi (KDNP) deputatlari prezident saylovida ishtirok etishdan bosh tortdi.
Baka – Inson huquqlari bo‘yicha Yevropa sudining sobiq sudyasi (1991–2008-yillar) va Vengriya Oliy sudining sobiq raisi (2009–2012-yillar).
Vengriya bosh vaziri Peter Madyar Baka nomzodini ilgari surar ekan, uning ishdan bo‘shatilishini noqonuniy deb atadi. Sudya Viktor Orban hukumati tomonidan amalga oshirilgan konstitutsiyaviy va qonunchilik islohotlarini tanqid qilgan edi.
Vengriyaning avvalgi prezidenti Tamash Shuyok parlament 18-iyul kuni uning vakolatlarini muddatidan oldin tugatish to‘g‘risidagi konstitutsiyaviy tuzatishni ma’qullaganidan so‘ng o‘z lavozimini tark etdi. Prezidentlikka shaxmatchi Yudit Polgar nomzodi ham ko‘rib chiqilgan, biroq u buni rad etgan.
Hokimiyatga kelganidan beri “Tisa” partiyasi amaldagi prezidentni bir necha bor iste’foga chiqishga chaqirgan edi. Bu partiya mamlakatni 16 yil boshqargan Viktor Orbanning “Fides” partiyasi o‘rnini egalladi. Mamlakatning amaldagi bosh vaziri Peter Madyar aprel oyidagi saylovdan avvalroq Shuyokning iste’fosiga erishishini aytgan, saylovda g‘alaba qozonganidan keyin esa uni bir necha bor “Viktor Orbanning qo‘g‘irchoq prezidenti” deb atagan edi.
Vengriyada prezident asosan tantanali va vakillik vazifalarini bajaradi. Asosiy hokimiyat bosh vazir boshchiligidagi hukumatga tegishli. Bu lavozimni may oyidan beri Peter Madyar egallab kelmoqda.
