Qoʻshimcha funksionallar
-
Tungi ko‘rinish
Vengriya Ukrainaning YeIga qo‘shilish bo‘yicha muzokaralarini yana blokladi
Vengriya Yevropa Ittifoqiga a’zo bo‘lish bo‘yicha Ukraina bilan olib borilayotgan muzokaralarning navbatdagi bosqichini boshlashga qarshi chiqdi. OAV ma’lumotlariga ko‘ra, Budapesht Ukraina uchun ikkinchi va uchinchi muzokara klasterlarini ochishga rozilik bermagani sababli masala bo‘yicha qaror qabul qilish keyingi yig‘ilishga qoldirildi.
Vengriya Ukrainaning Yevropa Ittifoqiga qo‘shilishi bo‘yicha muzokaralarning ikkinchi va uchinchi klasterlarini ochish jarayonini qo‘llab-quvvatlamadi. Bu haqda Ukrainaning «Yevropeyskaya pravda» nashri Yevropa Ittifoqidagi manbalariga tayanib xabar qildi.
Ma’lumotlarga ko‘ra, mazkur qaror 17 iyul kuni Yevropa Ittifoqi Kengashining kengayish masalalari bo‘yicha ishchi guruhi (COELA) yig‘ilishida qabul qilingan.
Muzokaralarning ikkinchi klasteri ichki bozor masalalarini, uchinchi klasteri esa raqobatbardoshlik va inklyuziv iqtisodiy o‘sish yo‘nalishlarini qamrab oladi.
Yig‘ilish ishtirokchilari Ukraina va Moldovaga ushbu ikki klaster bo‘yicha rasmiy muzokara pozitsiyalarini taqdim etish so‘ralgan maktubni yuborishni rejalashtirgan edi. Biroq Vengriya faqat Moldovaga uchinchi klaster bo‘yicha murojaat yuborilishini qo‘llab-quvvatlagan.
Nashr manbalariga ko‘ra, Yevropa Ittifoqining boshqa qator a’zo davlatlari Ukraina va Moldovani muzokara jarayonida alohida ko‘rib chiqish taklifiga qarshi chiqqan. Natijada masala yuzasidan yakuniy qaror qabul qilinmay, uni 22 iyul kuni bo‘lib o‘tadigan navbatdagi COELA yig‘ilishida qayta muhokama qilishga kelishilgan. Bu yig‘ilish yozgi tanaffusdan avvalgi so‘nggi uchrashuv bo‘ladi. Shundan keyin ishchi guruh faoliyati 1 sentabrgacha to‘xtaydi.
Yevropa Ittifoqi tashqi ishlar vazirlari 15 iyun kuni Ukraina va Moldova uchun «Asoslar» deb nomlangan birinchi muzokara klasterini rasman ochgan edi. 14 iyul kuni esa har ikki mamlakat uchun tashqi munosabatlarga bag‘ishlangan oltinchi klaster bo‘yicha ham muzokaralar boshlangan.
Garchi Ukrainaning Yevropa Ittifoqiga a’zo bo‘lish jarayoni rasman 2024 yil iyun oyida Lyuksemburgda boshlangan bo‘lsa-da, aynan muzokara klasterlarining ochilishi mamlakat qonunchiligini Yevropa Ittifoqi talablariga moslashtirish bo‘yicha amaliy muzokaralarning boshlanganini anglatadi. Bu jarayon 2026 yil iyuniga qadar Vengriyaning pozitsiyasi sabab to‘xtab qolgan edi.
Iyun oyi oxirida ham Vengriya Yevropa Ittifoqida Ukraina va Moldovaning a’zoligini qo‘llab-quvvatlovchi qo‘shma murojaatni Yevropa Kengashi va Yevropa komissiyasiga yuborishga qarshi chiqqan yagona davlat bo‘lgan.
Vengriya bosh vaziri Peter Madyar bu pozitsiyani izohlar ekan, Ukraina uchun barcha oltita muzokara klasterini bir vaqtning o‘zida ochish to‘g‘ri qaror emasligini ta’kidlagan. Uning fikricha, bunday qadam Serbiya, Albaniya, Chernogoriya va Shimoliy Makedoniya kabi Yevropa Ittifoqiga a’zo bo‘lish yo‘lida uzoq yillardan beri harakat qilib kelayotgan G‘arbiy Bolqon davlatlariga nisbatan noto‘g‘ri siyosiy signal yuborishi mumkin.
