Honor mexanik osma muruvvatga ega g‘ayrioddiy kamerali Robot Phone flagman smartfonini rasman taqdim etdi. U burila oladi, ob’yektlarni kuzatadi va hatto turli his-tuyg‘ularni namoyish etib, qurilmaning orqa panelini o‘ziga xos hamroh-robotga aylantiradi.
Honor miniatyura barqarorlashtirish tizimini yaratish uchun 60 dan ortiq ishlab chiqarish jarayonini qo‘llashi va 100 dan ziyod yuqori aniqlikdagi butlovchi qismlarni o‘rnatishiga to‘g‘ri keldi. Konstruksiya 100 dan ortiq patent bilan himoyalangan, ishlab chiqaruvchining o‘zi esa uni sohadagi eng ixcham 4D-osma deb ataydi.
Osmaning titanli motori 2,6 gramm og‘irlikka ega, qalinligi 6 mm, butun tizim esa qalinligi 9,6 mm bo‘lgan korpusga sig‘adi. Shu bilan birga, smartfonning o‘zi ancha og‘ir – 248 gramm.
Kamerani ovoz yordamida boshqarish mumkin: masalan, undan burilishni yoki ma’lum bir nuqtaga fokusni qaratishni so‘rash mumkin.
Tizim ob’yektlarni avtomatik ravishda tanib olish va kuzatish qobiliyatiga ega, shuningdek, real vaqt rejimida avtomatik kadrlashni qo‘llab-quvvatlaydi. Bu videobloglar suratga olishda, jonli efirlarda va videoqo‘ng‘iroqlar paytida asqatadi.
Honor Yoyo sun’iy intellekt yordamchisi bilan birgalikda osma kamera atrofda sodir bo‘layotgan voqealarni kuzatishi, atrofdagi ob’yektlar bilan o‘zaro aloqa qilishi va turli vazifalarni mustaqil ravishda bajarishi mumkin. Bundan tashqari, kamera 100 dan ortiq imo-ishoralarni qo‘llab-quvvatlaydi: u bosh irg‘ashi, mo‘ralashi va hatto musiqaga raqsga tushishi ham mumkin.
Robot Phone nemis kino uskunalari ishlab chiqarishga ixtisoslashgan Arri kompaniyasi bilan Honor hamkorligi doirasida chiqarilgan birinchi qurilma bo‘ldi. Smartfon o‘rnatilgan Log-C3 kodlashni, ranglarni to‘g‘rilash uchun bevosita qurilmaning o‘zida LUT bilan ishlashni va Arri professional kameralariga xos tasvir xususiyatlarini taqlid qiluvchi alohida kino rejimini qo‘llab-quvvatlaydi.
Dastlab Robot Phone kumushrang va kulrang tuslarda sotuvga chiqariladi. Smartfonning narxi va sotuvga chiqish sanasi haqidagi ma’lumotni Honor keyinroq e’lon qiladi.
