Rossiyada 10-avgustdan boshlab chet el fuqarosi tomonidan jismoniy shaxslardan olinadigan daromad solig‘i (NDFL) bo‘yicha avans to‘lovi amalga oshirilmagan taqdirda, uning patentini haqiqiy emas deb topish to‘g‘risida avtomatik ravishda qaror qabul qiluvchi xizmat ishga tushirildi. Bu haqda TASS agentligi Rossiya Ichki ishlar vazirligi matbuot markaziga tayanib xabar berdi.
Idoraning qayd etishicha, Rossiyada patent asosida ishlayotgan xorijliklar har oy avans to‘lovini to‘lashi shart. Ushbu to‘lov to‘lanmaganda patentning amal qilishi to‘xtatiladi. Shuningdek, IIV migrant uchun soliq to‘laydigan uchinchi shaxslarga to‘lovning maqsadi qismida uning to‘liq ma’lumotlari: familiyasi, ismi, otasining ismi, tug‘ilgan sanasi va STIR ko‘rsatishni tavsiya qildi - bu axborot tizimlarida to‘lovlarni to‘g‘ri hisobga olish uchun zarur.
Agar migrant patentni bekor qilish to‘g‘risidagi qarorga rozi bo‘lmasa, u NDFL to‘langani haqidagi kvitansiyalarning asl nusxalarini taqdim etgan holda, hujjatni bergan IIV hududiy organiga murojaat qilishi mumkin.
Eslatib o‘tamiz, 2027-yil 1-yanvardan Rossiyada xorijiy ishchilarga nisbatan talablar kuchaytiriladi: ular o‘zini va qaramog‘idagi oila a’zolarini boqish uchun yetarli daromadga ega ekanini tasdiqlashi kerak bo‘ladi, aks holda patent yoki ishlashga ruxsatnoma muddati uzaytirilmaydi.
Vaqtincha yashashga ruxsatnoma (RVP) va yashash guvohnomasini (VNJ) bekor qilish uchun asoslar kengaytirilmoqda, migrantlarning farzandlari mamlakatda bo‘lishining yangi qoidalari va NDFL bo‘yicha qo‘shimcha avans to‘lovlari, jumladan, jismoniy shaxslar qo‘lida ishlovchilar uchun ham joriy etilmoqda. Shu bilan birga, soliq organlari 2026-yil 1 oktyabrdan boshlab migrantlarning daromadlari to‘g‘risidagi ma’lumotlarni Ichki ishlar vazirligiga taqdim etishni boshlaydi.
