Qashqadaryo viloyatida ijtimoiy himoyaga muhtoj va kontrakt mablag‘ini to‘lashda qiynalayotgan oilalar farzandlarining oliy ta’lim olishini qo‘llab-quvvatlash choralari ko‘rilmoqda.
Viloyat hokimi Murod Azimov tomonidan ehtiyojmand oilalar farzandlarining oliy ta’lim muassasalarida tahsil olishini qo‘llab-quvvatlashga qaratilgan qaror qabul qilindi.
Qarorga muvofiq, Qashqadaryo viloyatidagi 856 nafar talaba-yoshning kontrakt to‘lovlarini qoplash uchun jami 3 milliard 780 million 600 ming so‘m mablag‘ ajratilgan.
Mazkur mablag‘lar, avvalo, oliy ta’lim olish istagida bo‘lgan, ammo oilaviy va moddiy sharoiti sabab kontrakt to‘lovini amalga oshirishda qiyinchilikka duch kelayotgan talabalarni qo‘llab-quvvatlashga yo‘naltiriladi.
Shuningdek, tashabbus xotin-qizlarning oliy ta’lim olish imkoniyatlarini kengaytirish, yoshlarning bilim va kasbiy salohiyatini oshirishga qaratilgan.
Qayd etilishicha, talabalarning kontrakt mablag‘larini to‘lab berish orqali ehtiyojmand oilalar farzandlarining ta’lim olishini davom ettirishiga ko‘maklashish ko‘zda tutilgan.
