Estoniya hukumati 13-avgust kuni bo‘lib o‘tgan yig‘ilishda Ichki ishlar vazirligining Rossiya bilan chegaradagi avtomobil o‘tish punktlarining 12 soatlik ish rejimini noma’lum muddatga uzaytirish haqidagi taklifini ma’qulladi. Shuningdek, mazkur tartib temiryo‘l o‘tish punktlariga ham joriy etiladi.
Estoniya Ichki ishlar vazirligi ma’lumotiga ko‘ra, «Narva», «Koydula» va «Luxamaa» chegara punktlari bahordan buyon soat 07:00 dan 19:00 gacha ishlab kelmoqda. Rossiya tomonida ularga mos ravishda Ivangorod, Kunichina Gora va Shumilkino nazorat punktlari joylashgan.
Dastlab mazkur vaqtinchalik rejim avgust oyi oxiriga qadar amal qilishi rejalashtirilgan edi. Endi esa uning amal qilish muddati cheklanmagan.
Estoniya ichki ishlar vaziri Igor Taroning ta’kidlashicha, cheklovlarning asosiy maqsadi chegara xavfsizligini kuchaytirish, ehtimoliy chegara hodisalariga tezkor javob berish imkoniyatini oshirish va bojxona nazoratini kuchaytirishdan iborat.
Uning so‘zlariga ko‘ra, ushbu maqsadlar hozir ham dolzarbligicha qolmoqda. Vazir qarorni Rossiya va Yevropa Ittifoqi o‘rtasidagi munosabatlarning umumiy holati, jumladan Ukrainadagi urush bilan ham bog‘lagan.
Shu bilan birga, Taro Estoniya hukumati hozircha Rossiya bilan chegarani to‘liq yopish uchun zarurat ko‘rmayotganini bildirdi. Qo‘shni Finlandiya esa Rossiya bilan quruqlikdagi chegara punktlarini 2023-yil dekabrida yopgan edi.
Chegaradan o‘tuvchilar soni kamaygan
Estoniya Ichki ishlar vazirligi ma’lumotlariga ko‘ra, Rossiya bilan quruqlik chegarasini kesib o‘tuvchilar soni ham qisqargan.
2025-yilning birinchi yarmida ikki davlat o‘rtasidagi quruqlikdagi nazorat punktlaridan qariyb 512 ming kishi o‘tgan bo‘lsa, 2026-yilning shu davrida bu ko‘rsatkich 444 ming nafarni tashkil etgan. Bu bir yil avvalgiga nisbatan 13 foizga kam.
Chegarani kesib o‘tgan transport vositalari soni ham 20 foizga - 43,5 mingtadan 35 mingtaga kamaygan. Temiryo‘l nazorat punktlari orqali harakatlangan poyezdlar sonida ham sezilarli pasayish qayd etilgan.
Rossiya esa 1-iyuldan Finlandiya, Estoniya va Latviya bilan chegaradagi to‘qqizta temiryo‘l o‘tish punktidan yettitasini yopgan. Estoniya yo‘nalishida Pechori-Pskovskiye punkti yopilgan, Leningrad viloyatidagi Ivangorod yuk va yo‘lovchi o‘tish punkti esa ochiq qoldirilgan.
Rossiya tomoni ushbu qaror sabablari va cheklovlar qancha muddat amal qilishi haqida ma’lumot bermagan.
