Germaniyada harbiy xizmatga majbur bo‘lgan 23 yoshdan 60 yoshgacha ukrainalik erkaklarga vaqtinchalik himoya maqomini berish tartibi o‘zgartirildi. Bu haqda 13-avgust kuni Germaniya Ichki ishlar vazirligi DW so‘roviga javoban ma’lum qildi.
Yevropa Ittifoqi Kengashining yaqinda qabul qilgan qaroriga muvofiq, yangi cheklov 2026-yil 31-iyuldan boshlab Germaniyaga kelgan ukrainalik erkaklarga taalluqli bo‘ladi.
Vaqtinchalik himoya maqomini olish uchun ular Ukraina hududini qonuniy asosda tark etganini yoki harbiy xizmatdan rasman ozod qilinganini tasdiqlovchi hujjatlarni taqdim etishi kerak bo‘ladi.
Yangi tartib Germaniyada avvaldan vaqtinchalik himoya maqomini olgan ukrainalik erkaklarga tatbiq etilmaydi.
Boshpana so‘rab murojaat qilish mumkin
Germaniya Ichki ishlar vazirligi ma’lum qilishicha, vaqtinchalik himoya olish uchun asosga ega bo‘lmagan, ammo mamlakatda qolishni istagan harbiy xizmat yoshidagi ukrainalik erkaklar boshpana so‘rab ariza topshirishi mumkin.
Bunday arizalar har bir shaxsning holatidan kelib chiqib, individual tartibda ko‘rib chiqiladi.
Shu bilan birga, vazirlik Ukrainada harbiy xizmat majburiyatining mavjudligi o‘z-o‘zidan qochqin maqomini berish uchun yetarli asos hisoblanmasligini ta’kidlagan.
Germaniya IIV mamlakat hududida qonuniy asoslarsiz bo‘lib turgan Ukraina fuqarolari deportatsiya qilinishi mumkinligini ham bildirgan.
YeI ukrainaliklar uchun vaqtinchalik himoyani 2028-yilgacha uzaytirgan
Yaqinda Yevropa Ittifoqi Rossiyaning Ukrainaga keng ko‘lamli bosqini sabab mamlakatni tark etgan ukrainaliklar uchun vaqtinchalik himoya rejimini 2028-yil mart oyigacha uzaytirgan edi.
Mazkur maqom Ukrainadan kelgan fuqarolarga YeIga a’zo davlatlarda qonuniy yashash va ishlash imkonini beradi.
Biroq Yevropa Ittifoqi Kengashi qaroriga ko‘ra, endi Ukraina qonunchiligida belgilangan harbiy majburiyatlarga rioya qilganini tasdiqlay olmaydigan yangi kelgan erkaklar ushbu maqomni avtomatik ravishda ololmaydi.
Qarorda bunday talab Ukrainaning hozirgi mudofaa ehtiyojlari hisobga olingan holda joriy etilayotgani qayd etilgan.
Yevropa Ittifoqiga a’zo har bir davlat ukrainalik erkaklar vaqtinchalik himoya olish uchun aynan qanday hujjatlarni taqdim etishi kerakligini mustaqil belgilaydi.
