2026-yil 14-avgustda qabul qilingan O‘RQ–1165-sonli qonun bilan ayrim qonun hujjatlariga o‘zgartirish va qo‘shimchalar kiritildi.
Qonun bilan iqtisodiy sudlarning ma’muriy boshqaruv tizimini soddalashtirishga qaratilgan o‘zgartirishlar nazarda tutilgan.
Shuningdek, ma’muriy sudlar ishlarni ko‘rib chiqish jarayonida ma’muriy huquqbuzarlik holatlarini aniqlasa, Ma’muriy javobgarlik to‘g‘risidagi kodeksning 180 va 181-moddalarida nazarda tutilgan huquqbuzarliklar to‘g‘risidagi ishlarni ham ko‘rib chiqishi belgilandi.
Ma’muriy sud ishlarini yuritish to‘g‘risidagi kodeksga ishonchning huquqiy himoyasi prinsipi ham kiritildi.
Yana bir muhim yangilik - ma’muriy sudlarda dastlabki eshituv instituti joriy etildi.
Unga ko‘ra, ma’muriy organlar, fuqarolarning o‘zini o‘zi boshqarish organlari hamda ular mansabdor shaxslarining qonunchilikka mos kelmaydigan va shaxslarning huquqlari hamda qonuniy manfaatlarini buzadigan qarorlari, harakatlari yoki harakatsizligi yuzasidan nizolashish to‘g‘risidagi ishlarni sud muhokamasiga tayyorlash jarayonida dastlabki eshituv o‘tkaziladi.
Sudya dastlabki eshituvni ariza sudga kelib tushgan kundan e’tiboran 20 kundan kechiktirmay o‘tkazishi kerak.
Dastlabki eshituv vaqtida sudya arizachining talablari va javobgarning e’tirozlarini aniqlashtiradi, arizadagi kamchiliklarni bartaraf etish choralarini ko‘radi.
Bundan tashqari, arizachiga zarur dalillarni, javobgarga esa o‘z fikrini yozma ravishda taqdim etish bo‘yicha tushuntirishlar beriladi. Sudya arizadagi talablar va ish bo‘yicha mavjud dalillarga dastlabki huquqiy baho ham beradi.
Dastlabki eshituv yakunlari bo‘yicha arizani ko‘rmasdan qoldirish, kelishuv bitimini tasdiqlash yoki ish bo‘yicha sud muhokamasini tayinlash to‘g‘risida ajrim chiqariladi.
