Prezident tomonidan 2026-yil 14-avgustda imzolangan O‘RQ–1165-son qonun bilan sudlar faoliyatiga oid ayrim qonun hujjatlariga o‘zgartish va qo‘shimchalar kiritildi.
Qonunga muvofiq, ma’muriy sudlar ishlarni muhokama qilish jarayonida ma’muriy huquqbuzarlik alomatlarini aniqlasa, Ma’muriy javobgarlik to‘g‘risidagi kodeksning 180- va 181-moddalarida nazarda tutilgan huquqbuzarliklar bo‘yicha ishlarni ko‘rib chiqishi mumkin.
Shuningdek, Ma’muriy sud ishlarini yuritish to‘g‘risidagi kodeksga «ishonchning huquqiy himoyasi» prinsipi kiritildi. Unga ko‘ra, manfaatdor shaxsning ma’muriy organ qaroriga nisbatan qonun bilan qo‘riqlanadigan ishonchi himoya qilinadi.
Qonun bilan ma’muriy sudlarda dastlabki eshituv instituti ham joriy etildi. Ma’muriy organlar, fuqarolarning o‘zini o‘zi boshqarish organlari va ular mansabdor shaxslarining qarorlari, harakatlari yoki harakatsizligi yuzasidan nizolashish to‘g‘risidagi ishlarni sud muhokamasiga tayyorlashda dastlabki eshituv o‘tkaziladi.
Sudya dastlabki eshituvni ariza sudga kelib tushgan kundan boshlab 20 kundan kechiktirmay o‘tkazishi kerak.
Dastlabki eshituvda arizachining talablari va javobgarning e’tirozlari aniqlashtiriladi, arizadagi kamchiliklarni bartaraf etish choralari ko‘riladi. Shuningdek, zarur dalillarni taqdim etish bo‘yicha tushuntirish berilib, talablar va ishdagi dalillarga dastlabki huquqiy baho beriladi.
Dastlabki eshituv natijasida sud arizani ko‘rmasdan qoldirish, kelishuv bitimini tasdiqlash yoki ishni sud muhokamasiga tayinlash to‘g‘risida ajrim chiqarishi mumkin.
Qonun rasmiy e’lon qilingan kundan e’tiboran kuchga kiradi.
