15-avgust kuni Rossiyaning Omsk shahrida qurilayotgan binoda yong‘in chiqishi oqibatida 11 kishi jarohatlanib, shifoxonaga yotqizildi.
Avvaliga RF tergov qo‘mitasining Omsk oblasti bo‘yicha boshqarmasi jabrlanganlarning barchasi O‘zbekiston fuqarolari ekani haqida xabar tarqatgandi. O‘zbekiston TIV matbuot kotibi Omonulla Fayziyev Kun.uz’ga bergan izohida bu ma’lumotni rad etib, jabrlanganlardan faqat ikki nafari O‘zbekiston fuqarolari ekanini ma’lum qildi.
Jabrlanuvchilarning barchasi ko‘p qavatli bino qurilishida ishlayotgan quruvchilar bo‘lishgan.
Mahalliy manbalarga ko‘ra, hodisaga payvandlash ishlari vaqtida izolyatsiya materiali alanga olishi sabab bo‘lgan. Voqea joyiga yetib kelgan FVV o‘t o‘chiruvchilari 1000 kvadrat metr maydonni qamrab olgan yong‘inni o‘chirishga bir soatdan ortiq vaqt sarflashgan, 5 kishini qutqarishgan, 11 kishi turli darajadagi tan jarohatlari bilan mahalliy shifoxonaga olib borilgan.
Keyinroq ulardan uch nafariga javob berilgan, qolgan sakkiz nafari esa og‘ir ahvolda jonlantirish bo‘limida qolmoqda. Ularda tananing 20 foizdan 90 foizigacha kuyish holatlari qayd etilgan.
