Unutilgan “obnal” muammosi, tijoriy ijara bo‘yicha tashabbus va Beeline bilan affillanayotgan Perfectum. O‘zbekistonlik tadbirkorlar davlat rahbari bilan muloqotda qanday fikr va tashabbuslarni ilgari surdi?
Prezident Shavkat Mirziyoyev 18-avgust kuni, tadbirkorlar bilan an’anaviy muloqotida o‘z nutqini boshlashdan oldin yangi davrning ilk pallalarida: “Ikkita ish o‘rni yaratgan tadbirkorni yelkamda ko‘tarib yurishga tayyorman” deya bergan va’dasida hali ham sobit ekanini aytdi:
“Ikkita-uchta ish o‘rni tashkil qilganlarni yelkamda ko‘taraman, deganimni hozir ham unutganim yo‘q. Yelkamda ko‘tarishda davom etishga sizlarning oldilaringda yana bir marta va’da berib, keyin ma’ruzamni boshlamoqchiman.
Bitta narsani aytishim kerak: bilasizlarmi, biz bir-birimizga juda yaqin bo‘ldik, davlat bilan biznes orasidagi ishonchli ko‘prik mustahkam bo‘lyapti. Xalqqa mana shunday ish joylari yaratganlaring uchun sizlardan minnatdorman”.
Chempion tadbirkorlar kitob yozadi
Davlat rahbari “chempion tadbirkorlar” deya e’tirof etilgan yirik biznesmenlarga murojaat qilib, islohotlardan avvalgi davrda tadbirkorlik muhiti qanaqa bo‘lgani, yangi davrda nimalar o‘zgargani va kelgusida nimalar qilinishi kerakligi haqida kitob yozishni so‘radi.
“Mana, chempion tadbirkorlar o‘tiribdi. Ular o‘zlarining 10 yillik tajribasini, [avval] nima bo‘lgani, nima bo‘ldi va nima bo‘lishi kerakligi to‘g‘risida bir kitob yozsalaring, men sizlardan minnatdor bo‘laman. Bilasizlarmi bu nima uchun kerak? Oralaringda yosh tadbirkorlar o‘tiribdi – bugun birinchi marta 25 ming tadbirkor qatnashyapti, sizlarning yo‘llaring ularga o‘rnak bo‘ladi. Sizlarga o‘xshashga harakat qiladi. Chempion tadbirkorlarimiz, sizlar bizning faxrimiz, qahramonlarimiz desak, balandparvoz gap emas, to‘g‘ri bo‘ladi. Sizlar qancha qiyin yo‘llardan o‘tgansizlar. Lekin bularga (yangi tadbirkorlarga – tahr.) qancha oson bo‘lyapti, shu osonlikni inobatga olib ikki karra ko‘p natijaga erishish bo‘yicha ularni da’vat qilsalaring, men sizlardan minnatdor bo‘laman”.
Perfectum va VEON bitimi
Yig‘ilishda so‘z olgan yana bir yirik tadbirkor, Perfectum aloqa operatori ta’sischisi Farhod Mamajonov VEON xalqaro holdingi (Beeline Uzbekistan kompaniyasining ham egasi) bilan O‘zbekistondagi telekommunikatsiya loyihasi bo‘yicha 200 mln dollarlik kelishuvga erishgani, endi Raqobat qo‘mitasining ruxsatini kutayotganini aytib, bu borada davlat rahbaridan yordam so‘radi.
