Davlat xavfsizlik xizmati boshqa huquqni muhofaza qiluvchi organlar bilan hamkorlikda «Umra» ziyoratini tashkil etish bilan bog‘liq noqonuniy holatlarni aniqladi.
Toshkent shahrida yashovchi, 1981-yilda tug‘ilgan shaxs tegishli litsenziyaga ega bo‘lmagan holda o‘zini «Umra» ziyoratini tashkil etishga ruxsat berilgan turistik firmaning vakili sifatida tanishtirgan.
U uch nafar fuqaroni Saudiya Arabistoniga «Umra» safariga yuborish va ularning ziyorat amallarini to‘liq bajarishini ta’minlash evaziga jami 3450 AQSh dollari talab qilgan.
DXX, Iqtisodiy jinoyatlarga qarshi kurashish departamenti va ichki ishlar organlari hamkorligida o‘tkazilgan tezkor tadbirda mazkur shaxs 3400 AQSh dollari va 600 ming so‘mni olayotgan vaqtida ashyoviy dalillar bilan ushlangan.
Yana bir holat Farg‘ona shahrida aniqlangan. Unda 1998-yilda tug‘ilgan shaxs o‘z tanishlari orqali to‘rt nafar fuqaroni «Umra» ziyoratiga yuborishni va’da qilib, buning evaziga jami 4200 AQSh dollari talab qilgan.
U so‘ralgan pul mablag‘ini olayotgan vaqtda DXX va ichki ishlar organlari xodimlari tomonidan ushlangan va uning noqonuniy harakatlariga chek qo‘yilgan.
Hozirda har ikki holat yuzasidan jinoyat ishlari qo‘zg‘atilib, tergov harakatlari olib borilmoqda.
