Davlat xavfsizlik xizmati xabariga koʻra, Samarqand shahrida yashovchi, 1956-yilda tugʻilgan mazkur shaxs Oqdaryo tumanida istiqomat qiluvchi toʻrt nafar fuqaroga Umra safarini tashkil etib berishni vaʼda qilgan.
Biroq uning bunday ziyoratni tashkil etishga vakolati boʻlmagan. Xabarda ushbu shaxs muqaddam firibgarlik bilan bogʻliq jinoyati uchun sudlangani ham qayd etilgan.
DXX va Samarqand viloyati Ichki ishlar boshqarmasi xodimlari hamkorligida oʻtkazilgan tezkor tadbirda u talab qilingan mablagʻning 3 ming dollarini oldindan olgan vaqtida ashyoviy dalillar bilan ushlangan.
Hozirda mazkur shaxsga nisbatan jinoyat ishi qoʻzgʻatilgan. Tergov harakatlari davom etmoqda.
DXX fuqarolardan shu kabi qonunbuzilish holatlariga duch kelganda 1520 qisqa raqamiga xabar berishni soʻragan. Murojaat qiluvchining shaxsi sir saqlanishi kafolatlanishi bildirilgan.
