O‘zbekiston Transport vazirligi Gruziya bilan hamkorlikda xalqaro avtomobilda yuk tashuvlari sohasida elektron ruxsatnoma (E-permit) tizimini joriy etdi.
Qayd etilishicha, Gruziya bilan “ikki tomonlama”, “tranzit” hamda “uchinchi davlatga/dan” turdagi ruxsatnoma blankalari taqsimlanuvchi blankalar turidan chiqarildi. Endilikda mazkur turdagi ruxsatnomalar milliy tashuvchilarga ularning arizalari asosida faqat elektron shaklda (E-permit) beriladi.
“Mazkur tizimning joriy etilishi ruxsatnomalarni olish jarayonini tezlashtirish, qog‘oz shaklidagi blankalardan foydalanishni qisqartirish, inson omilini minimallashtirish hamda xalqaro yuk tashuvlarini amalga oshirishda milliy tashuvchilar uchun yanada qulay va shaffof mexanizm yaratishga xizmat qiladi”, deyiladi Transport vazirligi xabarida.
