Vazirlar Mahkamasining 2026-yil 18-avgustdagi 443-son qarori bilan turistik startaplarni qo‘llab-quvvatlash bo‘yicha davlat xizmatini ko‘rsatishning ma’muriy reglamenti tasdiqlandi. Hujjat 19-avgust kuni davlat ro‘yxatidan o‘tkazilgan.
Qarorga ko‘ra, turistik startaplarni qo‘llab-quvvatlash uchun Turizmni qo‘llab-quvvatlash jamg‘armasi mablag‘lari hisobidan har yili eng yaxshi 10 tagacha loyihaga subsidiya ajratiladi.
Bunda startapni ishlab chiqish va amaliyotga joriy etish bilan bog‘liq xarajatlarning 50 foizi, biroq 1 mlrd so‘mdan ko‘p bo‘lmagan qismi qoplab beriladi. Subsidiya bitta talabgorga bir kalendar yil davomida bir marta ajratiladi.
Turistik startap deganda turistik xizmatlarni rivojlantirishga qaratilgan, sayyohlar uchun dolzarb bo‘lgan innovatsion xizmat, texnologiya yoki mahsulotni yaratishga qaratilgan yangi biznes loyiha tushuniladi.
Subsidiya olish uchun tadbirkorlik sub’yektining soliq va yig‘imlar bo‘yicha qarzdorligi bo‘lmasligi, shuningdek, u bankrotlik yoki tugatish jarayonida bo‘lmasligi talab etiladi.
Talabgorlar subsidiya olish uchun Davlat xizmatlari markazi yoki Yagona interaktiv davlat xizmatlari portali orqali Turizm qo‘mitasiga ariza topshiradi. Arizaga startapni amalga oshirish bo‘yicha biznes-reja va startap loyihasining taqdimot nusxasi ilova qilinishi kerak.
Arizani ko‘rib chiqish uchun to‘lov undirilmaydi. YaIDXP orqali murojaat qilinganda elektron raqamli imzo ham talab etilmaydi.
Hujjatda belgilangan tartibga ko‘ra, arizalar har chorak yakunining 20-sanasidan 25-sanasigacha qabul qilinadi.
Turizm qo‘mitasi raisi tomonidan turistik startap loyihalarini ko‘rib chiqish bo‘yicha maxsus komissiya shakllantiriladi. Komissiya talabgorning arizasi kelib tushgan kundan boshlab besh ish kunida suhbat o‘tkazish haqida xabarnoma yuboradi.
Suhbat videokonferensaloqa orqali yoki talabgorning shaxsan ishtirokida o‘tkazilishi mumkin. Unda tadbirkor o‘z startapini taqdim qiladi va komissiya a’zolarining savollariga javob beradi.
Shundan so‘ng komissiya 10 ish kuni ichida loyihaning belgilangan talablarga muvofiqligini o‘rganib, subsidiya ajratish masalasi bo‘yicha xulosa chiqaradi. Startapni baholashda uning muayyan turistik xizmatni rivojlantirishga qaratilgani, sayyohlar uchun dolzarbligi hamda mavjud bo‘lmagan yoki sezilarli darajada takomillashtirilgan yechimni taklif qilishi inobatga olinadi.
Komissiya xulosasi asosida Turizm qo‘mitasi ikki ish kunida subsidiya ajratish yoki uni rad etish to‘g‘risida qaror qabul qiladi. Qaror qabul qilinganidan keyin esa bir ish kunida uning nusxasi talabgorga yuboriladi. Subsidiya ajratish tasdiqlansa, mablag‘lar yetti ish kuni ichida tadbirkorning tijorat bankidagi hisobvarag‘iga o‘tkazib beriladi.
Subsidiya ajratilgan tadbirkorlik sub’yektlari ro‘yxati Turizm qo‘mitasining rasmiy veb-saytida e’lon qilib boriladi.
