“Tashabbusli byudjet”ning joriy mavsumida kelib tushgan 759 ta sheriklik loyihasidan 114 tasi gʻolib deb topildi.
Bu loyihalar uchun zarur mablagʻning 50 foizi tashabbuskorlar tomonidan toʻplanishi natijasida ular avtomatik ravishda, ovoz toʻplamasdan gʻolib boʻldi. Qolgan 50 foiz mablagʻ mahalliy byudjetdan yoʻnaltiriladi.
Sheriklik loyihalari boʻyicha fuqarolar mablagʻlarni 21-avgust, soat 17:00 ga qadar tranzit hisobraqamlarga oʻtkazishlari lozim.
“Tashabbusli byudjet” portalidagi maʼlumotlarga koʻra, joriy mavsumda 114 ta loyiha sheriklik asosida gʻolib deb topilgan boʻlib, shundan:
- 48 tasi – elektr energiyasi taʼminoti (transformator oʻrnatish, simyogʻochlarni almashtirish va boshqalar);
- 30 tasi – koʻcha chiroqlarini oʻrnatish yoki taʼmirlash;
- 22 tasi – ichki yoʻllarni taʼmirlash bilan bogʻliq.
Hozirga qadar Qashqadaryo viloyatida 33 ta, Samarqand viloyatida 23 ta, Xorazm viloyatida 15 ta, Navoiy viloyatida 14 ta, Sirdaryo viloyatida 9 ta, Buxoro va Surxondaryo viloyatlarida 7 tadan loyiha gʻolib boʻlib ulgurdi.
Toshkent shahri, Andijon, Fargʻona, Jizzax viloyatlari hamda Qoraqalpogʻiston Respublikasidan sheriklik asosida birorta loyiha gʻolib boʻlmadi.
Bugun tunda, 22-avgustdan boshlab loyihalarga ovoz berish jarayoni boshlanadi. Ovoz berish 31-avgustda yakunlanib, gʻoliblar 1-sentabr – Oʻzbekiston Mustaqilligining 35 yilligi bayrami kuni eʼlon qilinadi.
