Qonun Qonunchilik palatasi tomonidan 2026-yil 4-avgustda qabul qilingan va Senat tomonidan 8-avgustda ma’qullangan. Prezident uni 19-avgust kuni imzolagan, hujjat 20-avgustda davlat ro‘yxatidan o‘tkazilgan. Qonunning asosiy maqsadi Raqamli texnologiyalar xalqaro markazi hududida maxsus huquqiy rejim o‘rnatishdan iborat.
Hujjatga ko‘ra, Markaz faoliyati raqamli texnologiyalar sohasida investitsiyalarni jalb qilish, raqamli xizmatlar eksportini oshirish, startaplarni qo‘llab-quvvatlash, intellektual mulkni himoya qilish va innovatsion texnologiyalarni rivojlantirishga yo‘naltiriladi.
Markazdagi maxsus huquqiy rejim 2100-yilgacha amal qiladi. Uning hududi prezident tomonidan belgilanadi. Markazni tashkil etish zarurati tug‘ilganda uning hududi Toshkent shahrining alohida ma’muriy-hududiy birligi sifatida tashkil etilishi ham mumkin.
Ingliz tili rasmiy ish yuritish tili bo‘ladi
Qonunda Markazning rasmiy ish yuritish tili ingliz tili ekani belgilangan. Rasmiy ish yuritish jarayonida zarurat tug‘ilsa, davlat tilidan ham foydalanish mumkin. Markaz hujjatlarining davlat tiliga tarjimasi kirill yoki lotin alifbosida amalga oshirilishi mumkin.
Markazning oliy organi Boshqaruv kengashi hisoblanadi. U Markaz faoliyatining strategik yo‘nalishlarini belgilaydi va uning yuqori boshqaruvini amalga oshiradi. O‘zbekiston prezidenti Boshqaruv kengashi raisi hisoblanadi.
Markaz ishtirokchilari rezidentlar va investorlardan iborat bo‘ladi. Investorlar esa institutsional investor, startap-investor, rezident-investor va infratuzilmaviy investor kabi toifalarga ajratiladi.
«Tartibga solish qumdoni» joriy qilinadi
Qonunda «tartibga solish qumdoni» mexanizmi ham nazarda tutilgan. U innovatsion texnologiyalar, mahsulotlar va xizmatlarni nazorat qilinadigan muhitda sinovdan o‘tkazish imkonini beradi. Bunday sinovlar uchun amaldagi tartibdan farq qiluvchi maxsus tartib-taomillar belgilanishi mumkin.
Sinov natijalari ijobiy baholangan loyihalar bo‘yicha Markaz hududida maxsus huquqiy rejim doirasida loyihani belgilangan cheklovlarsiz amalga oshirishga ruxsat berish yoki uning ko‘lamini bosqichma-bosqich kengaytirish choralari ko‘rilishi mumkin.
