Rossiya bosh vaziri Mixail Mishustin avtobus, tramvay, trolleybus va yuk avtomobillarini boshqarish uchun belgilangan tibbiy cheklovlar roʻyxatiga oʻzgartirish kiritdi. Tegishli farmoyish 21-avgust kuni Rossiyaning huquqiy axborot rasmiy portalida eʼlon qilingan.
Yangi qoidalarga muvofiq, yuqori yoki quyi qoʻl-oyoq aʼzolaridan biri boʻlmagan shaxslar ham ushbu turdagi transport vositalarini boshqarishi mumkin. Shuningdek, qoʻl panjasi yoki oyoq kaftida jiddiy deformatsiyasi boʻlgan, barmoqlari yoki ularning ayrim falangalaridan ayrilgan shaxslarga ham haydovchilik qilishga ruxsat etiladi.
Ayni paytda, har ikki qoʻl yoki oyoq, shuningdek, ikkala qoʻl panjasi boʻlmagan holatlarda avtobus, tramvay, trolleybus va yuk avtomobillarini boshqarish taqiqlanganicha qoladi. Qoʻl panjalarining harakatini jiddiy qiyinlashtiradigan deformatsiyalar ham tibbiy cheklov sifatida saqlab qolingan.
Mazkur cheklovlarni qayta koʻrib chiqish masalasi 10-avgust kuni jamoat transportini rivojlantirishga bagʻishlangan Davlat kengashi yigʻilishida koʻtarilgan edi. Buratiya rahbari Aleksey Sidenov amaldagi talablarni oʻzgartirishni taklif qilgan. Yigʻilishda Rossiya prezidenti Vladimir Putin ham ishtirok etgan.
Sidenovning taʼkidlashicha, zamonaviy transport vositalari boshqaruvining avtomatlashtirilganlik darajasi Ukrainadagi urushda qatnashib, muayan jarohatlar olgan shaxslarga ham avtobus haydovchisi sifatida ishlash imkonini beradi.
19-avgust kuni Vladimir Putin ham Ukrainadagi urush qatnashchilarini ish bilan taʼminlash masalasiga toʻxtalgan. U ularning qaytishiga oldindan tayyorgarlik koʻrish zarurligini bildirgan va koʻplab harbiylar urushdan keyin mehnat bozoriga qaytishini aytgan.
Shu tariqa, yangi tartib ayrim jismoniy cheklovlarga ega shaxslarning avtobus va boshqa yirik transport vositalarini boshqarishiga qoʻyilgan avvalgi tibbiy toʻsiqlarni yumshatadi.
