Shunday yirik sport loyihalaridan biri - futbol va mini-futbol boʻyicha «Davlat xavfsizlik xizmati kubogi» musobaqalaridir.
Joriy yilda ham musobaqa respublika boʻylab keng koʻlamda tashkil etildi. Aprel–may oylarida tuman va shaharlar bosqichlari oʻtkazilgan boʻlsa, iyun–iyul oylarida bahslar viloyat darajasida davom etdi. Musobaqalarda jami 262 ming nafardan ortiq yoshlar ishtirok etdi.
Hududiy bosqichlarda gʻolib chiqqan va respublika bosqichiga yoʻllanma olgan 42 ta jamoa 17–22-avgust kunlari «Bunyodkor» futbol akademiyasi maydonlarida gʻoliblik uchun bahs olib bordi.
Murosasiz kechgan uchrashuvlarda har bir jamoa oʻz mahallasi va hududi sharafini munosib himoya qilishga intildi.
Ishtirokchilarning musobaqadan boʻsh vaqtlarini mazmunli tashkil etish maqsadida poytaxtning diqqatga sazovor maskanlariga sayohatlar ham uyushtirildi. Bu esa turli hududlardan kelgan yoshlar oʻrtasida doʻstlik va birdamlik muhitini yanada mustahkamlashga xizmat qildi.
Mini-futbol gʻoliblari
Oʻgʻil bolalar oʻrtasida mini-futbol boʻyicha Qashqadaryo viloyati jamoasi bosh sovrinni qoʻlga kiritdi. Toshkent shahri jamoasi ikkinchi, Namangan viloyati jamoasi esa uchinchi oʻrinni egalladi.
Gʻolib jamoa vakillari istiqomat qiladigan mahallaga zamonaviy mini-futbol maydoni qurib beriladi. Ikkinchi oʻrin sohiblari mahallasi universal sport maydoni, uchinchi oʻrinni egallagan jamoa mahallasi esa stritbol maydoni bilan taʼminlanadi.
Qizlar oʻrtasidagi mini-futbol bahslarida Toshkent viloyati jamoasi birinchi oʻrinni egalladi. Samarqand viloyati jamoasi ikkinchi, Toshkent shahri jamoasi uchinchi boʻldi.
Gʻolib va sovrindorlar pul mukofotlari hamda qimmatbaho sovgʻalar bilan taqdirlandi.
Futbolda Toshkent viloyati gʻolib
Oʻgʻil bolalar oʻrtasidagi futbol musobaqasida final yoʻllanmasi uchun kechgan uchrashuvlar ham shiddatli tus oldi.
Yakuniy natijalarga koʻra, Toshkent shahri jamoasi uchinchi oʻrinni egalladi. Bosh sovrin uchun esa Buxoro viloyati va Toshkent viloyati jamoalari maydonga tushdi.
Final uchrashuvi keskin va murosasiz kurashlarga boy boʻldi. Bellashuv taqdirini bitta gol hal qildi. Toshkent viloyati jamoasi Buxoro viloyati vakillarini 1:0 hisobida magʻlub etib, «Davlat xavfsizlik xizmati kubogi» gʻolibiga aylandi.
Shu tariqa, respublika boʻylab yuz minglab yoshlarni qamrab olgan navbatdagi «Davlat xavfsizlik xizmati kubogi» oʻz yakuniga yetdi. Musobaqa yoshlarni sportga keng jalb etish, hududlarda yangi iqtidorlarni kashf qilish va ularning professional futbol sari dastlabki qadamlarini qoʻyishi uchun muhim maydon vazifasini oʻtamoqda.
