2025-yilning iyul va 2026-yil iyun oyi holatiga koʻra, bitiruvchilarning respublika miqyosidagi oʻrtacha rasmiy oylik daromadi 4,9 mln soʻmni tashkil etdi, deya xabar berdi Taʼlim sifatini taʼminlash milliy agentligi.
Yoʻnalishlar kesimida esa eng yuqori oʻrtacha daromad ijod va sport sohalarida - 6,33 mln soʻm. Amaliy fanlar bitiruvchilari oʻrtacha 5,5 mln, ijtimoiy-gumanitar yoʻnalishdagilar 4,61 mln, tibbiyot bitiruvchilari esa 4,43 mln soʻm rasmiy daromad olgan.
Bitiruvchilarning oʻrtacha daromadi eng yuqori boʻlgan oliy taʼlim muassasalari:
- Toshkentdagi S.A. Gerasimov nomidagi Butunrossiya davlat kinematografiya instituti filiali - 23,4 mln soʻm;
- Inha universiteti - 12,6 mln soʻm;
- Vestminster universiteti - 12,5 mln soʻm;
- Jahon iqtisodiyoti va diplomatiya universiteti - 10,6 mln soʻm;
- Toshkent davlat iqtisodiyot universiteti - 10,3 mln soʻm;
- Toshkent axborot texnologiyalari universiteti - 9,4 mln soʻm;
- Singapur menejmentni rivojlantirish instituti - 9,3 mln soʻm;
- Plexanov nomidagi Rossiya iqtisodiyot universiteti Toshkent filiali - 9 mln soʻm;
- Toshkent davlat yuridik universiteti - 8,4 mln soʻm;
- Navoiy davlat konchilik va texnologiyalar universiteti - 8,1 mln soʻm.
Hududlar kesimida bitiruvchilarning eng yuqori oʻrtacha oylik daromadi Toshkent shahriga toʻgʻri keladi - 6,6 mln soʻm. Navoiy viloyatida esa bu koʻrsatkich qariyb 5 mln soʻmni tashkil qilgan. Kuchli uchlikdan 4,96 mln soʻm oʻrtacha oylik daromadi bilan Toshkent viloyati oʻrin olgan.
Agentlikka koʻra, bunda rasmiy qayd etilgan daromadlar hisobga olingan. Indeksni hisoblashda bitiruvchining daromadi u istiqomat qilayotgan hududdagi oʻrtacha ish haqi bilan solishtirilgan.
