«Oʻzbekiston Respublikasi Prezidentining tadbirkorlar bilan VI ochiq muloqotida belgilangan vazifalarni amalga oshirish chora-tadbirlari toʻgʻrisida»gi prezident farmoni qabul qilindi.
27-avgust kuni imzolangan farmonga koʻra, kichik tadbirkorlik subyektlarining faoliyatini har qanday tekshirishga 3 yil muddatga moratoriy eʼlon qilinishi belgilandi (bundan jinoyat ishi doirasida, inson sogʻligʻiga taʼsirini oʻrganish va mehnat qonunchiligiga rioya etilishi, fuqarolar murojaatlari, QQS qoplash (qaytarish) va tadbirkorlik subyekti tugatilishi munosabati bilan oʻtkaziladigan tekshirishlar mustasno).
Moratoriy amal qilish davrida kichik tadbirkorlik subyektlari faoliyatini tekshirish noqonuniy hisoblanadi va ushbu huquqbuzarlikka yoʻl qoʻygan shaxslar belgilangan tartibda javobgarlikka tortiladi.
Prezident huzuridagi Tadbirkorlik subyektlarining huquqlari va qonuniy manfaatlarini himoya qilish boʻyicha vakil (Biznes-ombudsman) tomonidan «Samarali nazorat»tadbiri oʻtkaziladi. Bunda:
- nazorat organlarining oxirgi 3 yillik tekshiruv materiallari joyiga chiqqan holda toʻliq oʻrganib chiqiladi;
- oʻrganish yakunlari boʻyicha nazorat organlari tomonidan yoʻl qoʻyilgan qonunbuzilishlar boʻyicha oʻz vakolatlari doirasida tegishli choralar koʻriladi;
- tekshiruv oʻtkazish tartibi buzilgan hamda noqonuniy tekshiruvlar aniqlangan hollarda faoliyati tekshirilgan tadbirkorlik subyektlarining buzilgan huquqlarini tiklash choralari koʻriladi.
