Ukraina prezidenti Volodimir Zelenskiy Ukraina harbiylariga Rossiya boʻylab kuniga mingta dron uchirish vazifasini qoʻyganini aytdi.
«Bugun Stavka yigʻilishini oʻtkazdim. Asosiy maqsad – Rossiyaning Ukrainaga berayotgan zarbalaridan himoyalanish uchun oʻz qurol-yarogʻlarimiz ishlab chiqarishni maksimal darajada oshirishdir. Eng muhimi – reaktiv «Shohid»lardan himoyamizni taʼminlash va Rossiyaga uzoq masofali zarbalarimizni yanada kuchaytirish. Vazifa – Rossiyaga qarshi uzoq masofali sanksiyalar uchun kuniga mingta dron. Hozir uzoq masofali sanksiyalarimiz oʻrtacha 300 tani tashkil etmoqda, bu koʻrsatkich yanada koʻproq boʻlishi kerak», dedi u.
Zelenskiy «maqsad mutlaqo aniq» ekanini va Ukraina «bu vazifani albatta bajarishini» qoʻshimcha qildi.
Iyul oyi boshida Zelenskiy Financial Times nashriga bergan intervyusida urushning asosiy bosqichi quruqlik va dengizdan havoga koʻchganini taʼkidlab, aynan «osmondagi jang» mojaro taqdirini hal qilishi haqidagi fikrni bildirgan edi.
«Moskva tomon yuzta emas, mingta dron uchsa, u [Vladimir Putin] shunda tushunadi. U buni shaxsan his qila boshlaganida, oʻz koʻzlari bilan koʻra boshlaganida... maslahatchilari uni Ural ortiga koʻchib oʻtishga koʻndiradi. Putin Moskvadan qanchalik uzoqlashsa, urushning yakuni ham shunchalik yaqinlashadi», – degan edi Zelenskiy.
