AQShning Tinch okeani mintaqasi shimoli-gʻarbiy nuqtasi Sietl shahrining meri 1-sentabr kunini Oʻzbekiston mustaqilligi bayrami sifatida nishonlovchi hujjatni imzolagandi. Poytaxt Vashington meri Miriyel Bauzer ham farmoyishga qoʻl qoʻyib, shaharda 1-sentabrni mustaqillik kuni deya eʼlon qildi.
Imzolangan deklaratsiyada mustaqillik kunining ahamiyati, AQShning esa Oʻzbekiston mustaqilligini birinchilardan boʻlib tan olgani koʻrsatib oʻtilgan.
“Bu yili Respublika oʻz mustaqilligining 35 yilligini nishonlaydi. Ushbu sana har yili 1-sentabrda bayram qilinib, oʻzbek xalqining boy madaniy merosi, erishgan yutuqlari hamda xalqaro hamjamiyatdagi nufuzini eʼtirof etadi”, deyiladi mer imzolagan hujjatda.
Miriyel Bauzer fikricha, AQShdagi elchi Furqat Sidiqov boshchiligidagi diplomatik korpus Vashington bilan yaqindan hamkorlik qilib, shaharning taʼlim sohasidagi va madaniy xilma-xilligini rivojlantirishga hissa qoʻshib kelmoqda.
“Biz butun dunyodagi oʻzbek jamoatchiligi bilan birgalikda Oʻzbekiston mustaqilligini nishonlar ekanmiz, doʻstlik, umumiy ezgu maqsadlarni qadrlaymiz. 2026-yilning 1-sentabri Vashington va Kolumbiya okrugida “Oʻzbekiston mustaqilligi kuni” deb eʼlon qilinadi”, deyiladi merning deklaratsiyasida.
