Shnobel mukofoti (Ig® Nobel Prize) har yili dastlab «kulgi uygʻotadigan, keyin esa oʻylashga undaydigan» kashfiyotlar uchun beriladi, deyiladi tashkilot saytida.
Biomexanika boʻyicha Shnobel mukofoti Matilda Brindl, Ketrin Talbot va Styuart Uestga chumolilar, qushlar, oq ayiqlar va odamlar misolida oʻpishning aniqroq taʼrifini ishlab chiqish uchun berildi. Ular yirik primatlarning aksariyati u yoki bu shaklda oʻpishadi, degan xulosaga kelishdi.
Iqtisodiyot boʻyicha Shnobel mukofoti Pol Pif, Deniyel Stankato, Stefan Kote, Rodolfo Mendosa-Denton va Decher Keltnerga yuqori ijtimoiy sinfga mansub odamlar koʻpincha bolalar zaxirasidan konfet olishi va boshqa axloqsiz xatti-harakatlarni sodir etishi haqida dalillar toʻplaganligi uchun berildi.
Kimyo boʻyicha Shnobel mukofoti Sanchari Banerji, Natan Kussens, Fransua-Ksave Gall, Nitish Satyanarayanan, Jandhyam Shrikant, Koichiro Yagi, Jeyms Grey, Stiven Tobe, Barbara Stey, Leonard Chavas va Subramanyan Ramasvamiga tirik tugʻuvchi suvarak sutidagi oqsillar sigir sutidagi oqsillaria qaraganda uch baravar koʻp energiyaga ega ekanini aniqlagani uchun berildi.
Tibbiyot boʻyicha Shnobel mukofoti vafotidan soʻng Tokuji Unnoga «Qanday qilib burun qoqish kerak - burun qoqishning aerodinamik tadqiqoti» ilmiy ishi uchun berildi. Marhum doktor Unno nomidan mukofotni uning hamkasbi doktor Miki Takaxara oldi.
Biologiya boʻyicha Shnobel mukofoti Joau Migel Alves-Nunes, Adriano Fellone, Selma Mariya Almeyde-Santos, Karlos Roberto de Medeiros, Ivan Sazima va Otavio Augusto Vuolo Markesga zaharli ilonlar tanasining turli qismlarini ehtiyotkorlik bilan bosib, tajribani turli haroratlarda va kunning turli vaqtlarida qayta-qayta takrorlaganligi uchun berildi.
Fizika boʻyicha Shnobel mukofoti Rendi Xyord, Chjao Pan, Ted Traskott va Kavishan Turairajaga sachramaydigan siydik idishini yaratish boʻyicha nazariy va eksperimental urinishlari uchun berildi. Ular prototiplarni yaratdi va ularni mavjud modellar bilan solishtirdi. Bir necha yuzlab tajribalar oʻtkazildi.
Texnologiya boʻyicha Shnobel mukofoti Jastin Puma, Chjen Yan, Evan Jonston, Szixin Chjan, Syaoi Lan, Linji Chjan, Xunyuy Xou, Szixin Xe, Ali Afifi, Megan Krayton, Szyanyuy Li va Chanxun Saolarga chivin xartumlarini 3D bosma uchun yuqori aniqlikdagi soplo sifatida joriy etish uchun berildi. Bu jarayon «nekroprinterlash» nomini oldi. Maʼlum boʻlishicha, xartumlar yuqori bosimga bardosh bera oladi va chop etish qobiliyati baʼzi muqobillarga qaraganda yuqori ekan. Mualliflar hatto boshqa hasharotlar, masalan, toʻshak kanalari yoki setse pashshalarining xartumlarini ham xuddi shunday sifatda sinab koʻrishni taklif qilishdi.
