Visual Capitalist infografikasi Lloyd’s List’ning 2026-yilgi reytingiga asoslangan. Undagi oʻrinlar 2025-yildagi konteyner aylanmasi boʻyicha belgilangan.
Hajmlar TEU - 20 futlik, yaʼni taxminan 6,1 metr uzunlikdagi standart konteynerga teng shartli birlikda hisoblangan. Statistikaga yuk ortilgan konteynerlar ham, boʻsh konteynerlar ham kiritilgan.
Shanhay portining konteyner aylanmasi AQShning eng yirik konteyner porti - Los-Anjeles koʻrsatkichidan besh barobardan ziyod boʻlgan.
Reytingdagi 30 portning jami konteyner aylanmasi qariyb yarmi Xitoy portlari hissasiga toʻgʻri kelgan. Bu hisobga 13 million TEU koʻrsatkichga ega Honkong ham kiritilgan.
Shanhayning ustunligi nimada?
Shanhay porti faqat shaharning oʻziga xizmat qilmaydi. Ichki suv yoʻllari va temiryoʻllar uni Yanszi daryosi boʻyidagi sanoat markazlari bilan bogʻlaydi. Shu orqali Xitoyning markaziy va sharqiy hududlaridagi ishlab chiqaruvchilar mahsulotlarini xorijiy bozorlarga chiqaradi.
Ishlab chiqarishning Osiyodagi boshqa mamlakatlarga ham kengayishi va Xitoyning Janubi-sharqiy Osiyo bilan savdo aloqalari mustahkamlanishi mintaqaviy yuk tashish tarmoqlarini rivojlantirmoqda. Bu jarayonda Xitoy portlari muhim oʻrinni saqlab qolyapti.
Singapur - yuklar uchun «tranzit aeroport»
Singapurning port modeli esa koʻproq xalqaro dengiz yoʻnalishlarini bir-biriga bogʻlashga asoslangan. U dunyodagi 600 dan ortiq port bilan aloqa qiladi.
Bu yerda konteynerlar bir kemadan boshqasiga oʻtkazilib, keyin manzili sari yoʻl oladi. Shu jihatdan Singapurni yoʻlovchilar boshqa reysga oʻtadigan tranzit aeroportga qiyoslash mumkin. Yuklarni qayta ortishga asoslangan bu tizim kichik shahar-davlatning dunyoda ikkinchi oʻringa chiqishiga yordam bergan.
Chuqur suvli prichallar va avtomatlashtirilgan elektr kranlari yangi terminallarga eng yirik konteyner tashuvchi kemalarni qabul qilish imkonini beradi.
Singapur Tuas portini qurish orqali quvvatlarini yana kengaytirmoqda. Loyiha konteyner operatsiyalarini bir joyga jamlashni koʻzda tutadi. Uni 2040-yillarda toʻliq yakunlash rejalashtirilgan boʻlib, shundan soʻng portning yillik oʻtkazish quvvati 65 million TEU'ga yetishi kutilmoqda.
