Oʻzbekistonda 2026-yilning yanvar–iyul oylarida yirik sanoat korxonalari tomonidan tabiiy gaz, neft va gaz kondensati ishlab chiqarish hajmi oʻtgan yilning shu davriga nisbatan kamaygan. Shu bilan birga, avtomobil benzini ishlab chiqarish 8,9 foizga, dizel yoqilgʻisi ishlab chiqarish esa 1,4 foizga oshgan.
Milliy statistika qoʻmitasi maʼlumotlariga koʻra, yanvar-iyul oylarida yirik korxonalar tomonidan 21,6 mlrd kub metr tabiiy gaz ishlab chiqarilgan. Bu 2025-yilning mos davridagi 25,4 mlrd kub metrga nisbatan 15 foizga kam.
Mahsulot | 2024-yil yanvar–iyul | 2025-yil yanvar–iyul | 2026-yil yanvar–iyul | 2025-yilga nisbatan |
Tabiiy gaz | 26,3 mlrd m³ | 25,4 mlrd m³ | 21,6 mlrd m³ | −15,0 foiz |
Neft | 424,8 ming t | 378,8 ming t | 368,7 ming t | −2,7 foiz |
Gaz kondensati | 725,7 ming t | 667,9 ming t |
−15,0 foiz |
Avtomobil benzini | 791,3 ming t | 672,1 ming t | 731,9 ming t | +8,9 foiz |
Dizel yoqilgʻisi | 624,4 ming t | 673,7 ming t | 683,4 ming t | +1,4 foiz |
Koʻmir | 3,5 mln t | 4,0 mln t | 3,5 mln t | −12,5 foiz |
Tabiiy gaz ishlab chiqarish hajmi 2024-yilning yanvar–iyul oylarida 26,3 mlrd kub metr boʻlgan. Shunday qilib, ikki yil ichida gaz ishlab chiqarish qariyb 17,9 foizga kamaygan.
Hisobot davrida Oʻzbekistonda 368,7 ming tonna neft ishlab chiqarilgan. Bu koʻrsatkich 2025-yilning shu davrida 378,8 ming tonna boʻlgan. Yillik hisobda neft ishlab chiqarish 2,7 foizga kamaygan.
2024-yilning yanvar-iyul oylarida esa 424,8 ming tonna neft ishlab chiqarilgan. Demak, ikki yil ichida neft ishlab chiqarish hajmi 13,2 foizga qisqargan.
Gaz kondensati ishlab chiqarishdagi pasayish yanada sezilarli boʻlgan. 2026-yilning dastlabki yetti oyida 567,5 ming tonna gaz kondensati ishlab chiqarilgan. 2025-yilning mos davrida bu koʻrsatkich 667,9 ming tonna, 2024-yilda esa 725,7 ming tonna edi. Shu tariqa, gaz kondensati ishlab chiqarish bir yil ichida 15 foizga, 2024-yilga nisbatan esa 21,8 foizga kamaygan.
Xomashyo qazib olishdagi pasayishga qaramay, avtomobil benzini ishlab chiqarish hajmi oshgan. 2026-yil yanvar–iyul oylarida yirik korxonalar 731,9 ming tonna avtomobil benzini ishlab chiqargan. Bu 2025-yilning mos davridagi 672,1 ming tonnaga nisbatan 8,9 foiz koʻp.
Biroq benzin ishlab chiqarish hali ham 2024-yildagi koʻrsatkichdan past. Oʻsha yilning dastlabki yetti oyida 791,3 ming tonna avtomobil benzini ishlab chiqarilgan. 2024-yilga nisbatan ishlab chiqarish hajmi 7,5 foizga kamaygan.
Dizel yoqilgʻisi ishlab chiqarishda ham oʻsish kuzatilgan. 2026-yil yanvar–iyul oylarida 683,4 ming tonna dizel ishlab chiqarildi. 2025-yilning mos davrida bu koʻrsatkich 673,7 ming tonna boʻlgan. Yillik oʻsish 1,4 foizni tashkil etdi. 2024-yilning yanvar–iyul oylarida esa 624,4 ming tonna dizel ishlab chiqarilgan. Demak, ikki yil ichida dizel ishlab chiqarish 9,4 foizga oshgan.
Koʻmir ishlab chiqarish hajmi ham pasaygan. 2026-yilning yanvar-iyul oylarida yirik sanoat korxonalari tomonidan 3,5 mln tonna koʻmir qazib olingan. Bu 2025-yilning shu davridagi 4 mln tonnaga nisbatan 12,5 foiz kam.
2024-yilning yanvar-iyul oylarida ham 3,5 mln tonna koʻmir ishlab chiqarilgan. Yaʼni ikki yil oldingi koʻrsatkich bilan solishtirganda hajm deyarli oʻzgarmagan.
Shuningdek, Milliy statistika qoʻmitasi 2026-yil yanvar-iyul oylarida koʻmirni yer ostida gazga aylantirish natijasida olinadigan gaz ishlab chiqarilmaganini qayd etgan.
Umuman, statistika maʼlumotlari 2026-yilning dastlabki yetti oyida yoqilgʻi-energetika sektorida qazib olinadigan asosiy resurslar - tabiiy gaz, neft, gaz kondensati va koʻmir ishlab chiqarish hajmi qisqarganini koʻrsatmoqda. Qayta ishlash mahsulotlari orasida esa benzin ishlab chiqarish sezilarli oshgan, dizel ishlab chiqarish esa nisbatan barqaror oʻsishda davom etgan.
Shu davrda Oʻzbekistonning jami sanoat ishlab chiqarishi hajmi 795,4 trln soʻmni tashkil etib, oʻtgan yilning mos davriga nisbatan 7,9 foizga oshgan.
Eslatib oʻtamiz, 2026-yilning birinchi yarmida gaz qazib olish hajmi 18,3 mlrd kub metrni tashkil etib, 2025-yilning mos davriga nisbatan qariyb 3,6 mlrd kub metrga yoki 16,4 foizga, 2024-yilning mos davriga nisbatan esa 4,2 mlrd kub metrga yoki 18,6 foizga qisqargandi. Xususan, iyun oyida gaz qazib olish hajmi 2,5 mlrd kub metrgacha kamayib, joriy yildagi eng minimal koʻrsatkichni qayd etgandi.
