Mazkur ishlar prezidentning Sergeli tumaniga tashrifi davomida berilgan topshiriq asosida amalga oshirilgan.
Salar inshooti Toshkent shahrining 7 ta tumanidan keladigan oqova suvlarni qabul qilib, tozalaydi. Inshootning sutkalik quvvati 900 ming kub metrni tashkil etadi.
Inshoot atrofidagi noxush hidni kamaytirish uchun 9,5 mlrd soʻmlik zamonaviy filtr uskunasi oʻrnatilgan.
Shuningdek, oqova suv hovuzlari germetik tarzda yopilgan. Ulardan chiqayotgan hidli havo yangi filtr tizimi orqali oʻtkazilib, tozalanadi va zararsizlantiriladi.
Maʼlumotga koʻra, yangi uskuna 15 kundan ortiq vaqtdan beri ishlab kelmoqda. Koʻrilgan choralar natijasida Salar inshooti atrofidagi noxush hidlar yoʻqolgani bildirildi.
Yaqin hududlarda yashovchi aholi ham noxush hid sezilarli darajada bartaraf etilganini tasdiqlagani qayd etildi.
