Vazirlar Mahkamasining 2026-yil 4-sentabrdagi 460-son qarori bilan «Vazirlar Mahkamasi huzuridagi Oʻzbekiston akkreditatsiya markazi davlat muassasasi toʻgʻrisida»gi nizom tasdiqlandi.
Nizom «Oʻzbekiston akkreditatsiya markazi» davlat muassasasining huquqiy maqomi, asosiy vazifa va funksiyalari, huquqlari, shuningdek, uning faoliyatini tashkil etish tartibini belgilaydi.
Hujjatga muvofiq, muvofiqlikni baholash organlarini akkreditatsiyadan oʻtkazish sohasida yagona davlat siyosatini amalga oshirish Markazning asosiy vazifalaridan biri etib belgilandi.
Shuningdek, Akkreditatsiya markazi xalqaro va milliy akkreditatsiya organlari bilan faol hamkorlik qiladi. Sohaga xalqaro standartlar va texnik reglamentlarni joriy etish ham uning asosiy vazifalari qatoriga kiritildi.
Markazga qanday huquqlar berildi?
Nizom bilan Akkreditatsiya markaziga oʻziga yuklatilgan vazifa va funksiyalarni bajarish uchun qator huquqlar berilgan.
Jumladan, Markaz oʻz vakolatiga kiradigan masalalar boʻyicha respublika ijro etuvchi hokimiyat organlari, xoʻjalik birlashmalari hamda mahalliy ijro etuvchi hokimiyat organlari faoliyatini belgilangan tartibda muvofiqlashtirishi mumkin.
Shuningdek, Markaz oʻz vakolati doirasidagi masalalar boʻyicha zarur statistik axborotlarni statistika organlaridan bepul olish huquqiga ega boʻladi.
Direktor Vazirlar Mahkamasi tomonidan tayinlanadi
Akkreditatsiya markazi faoliyatiga direktor rahbarlik qiladi.
Nizomga koʻra, Markaz direktori Oʻzbekiston Prezidenti administratsiyasi bilan belgilangan tartibda kelishilgan holda Vazirlar Mahkamasi tomonidan lavozimga tayinlanadi va lavozimdan ozod etiladi.
Yangi nizom shu tariqa Akkreditatsiya markazining davlat boshqaruvi tizimidagi maqomi, vakolatlari va boshqaruv mexanizmini belgilab berdi.
