Oʻzbekistonning oltin-valyuta zaxiralari avgust oyida qariyb 7,8 mlrd dollarga koʻpayib, 1-sentabr holatiga 72,1 mlrd dollarni tashkil etdi. Bu haqda Markaziy bank taqdim etgan hisobotda keltirib oʻtilgan.
Oʻtgan oy davomida zaxiralarning valyuta qismi 1 mlrd dollarga qisqargan boʻlsa, oltin qismining qiymati 8,8 mlrd dollarga koʻpayib, 64,9 mlrd dollarga yetdi. Oʻz navbatida zaxiralar tarkibida oltinning fizik hajmi 13,8 mln troya unsiyadan 14,1 mln troya unsiyaga koʻpaygan.
Regulyator investitsiya kiritgan qimmatli qogʻozlar portfeli deyarli oʻzgarmagan - 1,7 mlrd dollar.
«Oʻzbekiston Respublikasining yalpi xalqaro zaxiralari hajmi 2026-yil avgust oyida 7,8 mlrd dollarga oshdi. Xususan, oy davomida oltin narxining 4052,2 dollardan 4602 dollargacha oʻsishining taʼsiri 7,8 mlrd dollarni tashkil etdi», deyiladi MB izohida.
Avgustda oltin nega qimmatlashdi?
Avgust boshida oltinning bir troya unsiyasi 4000 dollar atrofida sotilgan boʻlsa, oyning birinchi yarmida kotirovkalar jadal oʻsa boshladi. Qimmatbaho metall narxi eng yuqori choʻqqiga chiqib, bir unsiya uchun qariyb 4700 dollargacha qimmatlashdi. Oy oxiriga kelib bozorda korreksiya yuz berdi va narx bir unsiya uchun 4438 dollar atrofida shakllandi. Oʻtgan oy davomida narxlarning oshishiga quyidagi omillar taʼsir qilgan boʻlishi mumkin.
Iyul oyi oxirida AQSH va Yaponiya hukumati iyenani qoʻllab-quvvatlash va uning qadrsizlanishini toʻxtatish maqsadida birgalikda valyuta intervensiyasini amalga oshirdi. Avgust oyiga kelib bu harakatlar oʻz natijasini berdi: iyena keskin mustahkamlandi, AQSH dollari esa zaiflashdi. Dollar indeksining pasayishi dollarda baholanuvchi oltinga boʻlgan global talabni ragʻbatlantirdi.
Bozordagi eng katta burilishlardan biri 19-avgust kuni yuz berdi. AQSH Moliya vaziri Skott Bessent uzoq muddatli davlat obligatsiyalarini qayta sotib olish hajmini ikki barobar oshirishni eʼlon qildi. Hukumatning bozorga qoʻshimcha mablagʻ kiritib, daromadlilikni sunʼiy ushlab turishga urinishi investorlar tomonidan «dollarning qadrsizlanishiga yoʻl ochish» sifatida baholandi. Aynan ushbu eʼlondan soʻng, oltin narxi keskin yuqoriga sakradi.
