Davlat ekologik nazorat inspeksiyasi (Ekopolitsiya) Sirdaryo suv havzasini nazorat qilish boʻlimi xodimi Mirzo Botirov xizmat vazifasini bajarish vaqtida halok boʻldi.
Ekologiya va iqlim oʻzgarishi milliy qoʻmitasi matbuot xizmatiga koʻra, Mirzo Botirov 9-sentabr kuni tungi soat 23:00 da Sirdaryo daryosi oʻzanida oʻtkazilgan tezkor reyd tadbiri davomida elektr qarmoq yordamida baliq ovlayotgan huquqbuzarlarning qarshiligiga uchragan va natijada suvga tushib ketgan.
Tegishli tashkilotlar bilan hamkorlikda olib borilgan qidiruv ishlari natijasida bugun, 10-sentabr kuni inspektorning jasadi topildi.
«Ekologiya va iqlim oʻzgarishi milliy qoʻmitasi Mirzo Botirovning oila aʼzolari va yaqinlariga chuqur taʼziya izhor etadi.
Ayni damda marhumning oila aʼzolariga zarur moddiy va maʼnaviy koʻmak koʻrsatish, shuningdek, voqeaning barcha tafsilotlarini oʻrganish boʻyicha tegishli choralar koʻrilmoqda.
Shu bilan birga, Mirzo Botirov umrini atrof-muhitni muhofaza qilishga bagʻishladi. Uning tabiatni muhofaza qilish va ekologik qonunchilik talablarini taʼminlash yoʻlidagi fidokorona xizmatlari hamda koʻrsatgan jasorati munosib baholanib, u “Tabiat himoyachisi” koʻkrak nishoni bilan vafotidan soʻng taqdirlanadi», deyiladi qoʻmita xabarida.
