Dastlabki maʼlumotlarga koʻra, Bahrom Toshpoʻlatov Gʻuzor tumani Qovchin MFY hududidan oqib oʻtuvchi Qashqadaryo daryosida noqonuniy qum-shagʻal qazib olish holatlarini aniqlash boʻyicha reyd tadbirida huquqbuzarlar hujumiga uchragan.
Uni shu hududda fuqarolardan biri hushsiz holatda topib, shifoxonaga olib kelgan.
Shuningdek, 6-sentabrdan 7-sentabrga oʻtar kechasi Gʻuzor tumani Qovchin MFYning Arab qishlogʻi hududida ekopolitsiya inspektorlari tomonidan ekologik nazorat reydi oʻtkazilgan.
Reyd davomida Qashqadaryo daryosining muhofaza etiladigan hududida noqonuniy qum-shagʻal qazib olinayotgani aniqlangan. Ekopolitsiya xodimlari qonunbuzarlikni toʻxtatib, texnikani jarima maydoniga olib ketayotgan vaqtida huquqbuzarlar ularga faol qarshilik koʻrsatgan.
Xususan, uchta avtomobilda kelgan shaxslar yoʻlni toʻsib, inspektorlardan biriga tan jarohati yetkazgan. Shuningdek, jarima maydoniga olib ketilayotgan texnika vositasini olib qochgan.
Mazkur holatlar yuzasidan Gʻuzor tuman prokuraturasi va IIBning tezkor-tergov guruhi tomonidan tergovga qadar tekshiruv olib borilmoqda.
