2026-yil 15-sentabrdan boshlab ichki valyuta bozorida valyuta almashuv kursini shakllantirish va eʼlon qilish amaliyoti takomillashtiriladi, deya maʼlum qildi Oʻzbekiston Markaziy banki.
Endilikda Markaziy bankning rasmiy valyuta almashuv kurslari faqat valyuta birjasidagi bitimlar asosida emas, balki banklararo birjadan tashqari bozorda tuzilgan bitimlarni ham inobatga olgan holda hisoblanadi.
Xususan, rasmiy kurs birja va birjadan tashqari tuzilgan bitimlarning oʻrtacha tortilgan kursi asosida shakllantiriladi. Bu esa rasmiy almashuv kursini hisoblashda ichki valyuta bozoridagi bitimlarni kengroq qamrab olish va bozor holatini yanada aniq aks ettirish imkonini beradi.
Shuningdek, dam olish kunlari, shu jumladan shanba va yakshanba kunlari uchun oxirgi ish kuni boʻyicha rasmiy eʼlon qilingan kurslardan foydalanish amaliyotiga oʻtiladi.
Maʼlumot uchun, amalda juma kungi savdolar yakunida eʼlon qilinadigan rasmiy kurslar dushanba kunidan boshlab amal qiladi, juma-shanba-yakshanba kunlari esa payshanba kuni eʼlon qilingan kurs amalda boʻladi.
Eslatib oʻtamiz, Markaziy bankning rasmiy valyuta kursi – buxgalteriya hisobi, statistik va boshqa hisobotlar, bojxona toʻlovlari va boshqa majburiy toʻlovlarni hisoblashda qoʻllaniladi. Xorijiy valyutaning sotish va sotib olish kurslarini tijorat banklari bozor mexanizmlari asosida mustaqil belgilaydi.
