Davlat ekologik nazorati inspeksiyasining (Ekopolitsiya) Sirdaryo suv havzasini nazorat qilish boʻlimi xodimi Mirzo Botirovning ehtiyotsizlik oqibatida oʻlimiga sabab boʻlishda gumonlanib, uch kishi qoʻlga olindi.
Gazeta Bosh prokuratura matbuot xizmatiga tayanib xabar berishicha, voqea yuzasidan Jinoyat kodeksining uchta moddasi boʻyicha jinoyat ishi qoʻzgʻatilgan:
202-modda – hayvonot yoki oʻsimlik dunyosidan foydalanish tartibini buzish;
219-modda – hokimiyat vakiliga yoki fuqaroviy burchini bajarayotgan shaxsga qarshilik koʻrsatish;
102-modda – ehtiyotsizlik orqasida odam oʻldirish.
Ekologiya va iqlim oʻzgarishi milliy qoʻmitasi matbuot xizmatiga koʻra, Mirzo Botirov 9-sentabr kuni tungi soat 23:00 da Sirdaryo daryosi oʻzanida oʻtkazilgan tezkor reyd tadbiri davomida elektr qarmoq yordamida baliq ovlayotgan huquqbuzarlarning qarshiligiga uchragan va natijada suvga tushib ketgan.
Inspektorning jasadi 10-sentabr kuni topilgan.
Mirzo Botirov jasorati va xizmat burchiga sadoqati uchun vafotidan soʻng «Tabiat himoyachisi» koʻkrak nishoni bilan taqdirlanishi qayd etilgan.
