«Biz energiya sulhiga tayyormiz, lekin bu Ukraina uchun nimani anglatishini tushunishimiz kerak. Putin uchun energetika - bu neft va gaz sotishdir. Biz uchun energetika - bu xalqimiz uchun elektr va gazdir» - dedi Zelenskiy CBS News telekanaliga bergan intervyusida.
Uning soʻzlariga koʻra, Kiyevdagi muzokaralarda AQSH prezidentining maxsus vakillari Stiv Uitkoff va Jared Kushner energetika obyektlariga zarba berishni toʻxtatish masalasini koʻtargan. Xususan, ular Rossiyadagi neftni qayta ishlash zavodlariga (NQIZ) zarba bermaslikni taklif qilgan.
Zelenskiy, shuningdek, bundan tashqari, don eksporti blokadasi masalasini hal qilish zarurligini taʼkidladi, chunki Ukraina taxminan 30 million tonna, Rossiya esa 70 million tonna qishloq xoʻjaligi mahsulotlarini sotishi kerak.
«Hatto urush paytida ham vaziyatni yumshatish uchun maʼlum imkoniyatlarni topish mumkin. Agar siz muzokaralar olib borayotgan boʻlsangiz, bu urushni tugatish uchun yaxshi niyat yoki siyosiy irodani namoyish etayotganingizni anglatadi» - deb taʼkidladi Zelenskiy.
Avvalroq AQSH prezidenti Donald Tramp Ukraina va Rossiya bir-birining energetika obyektlariga zarba bermaslikka kelishib olganini maʼlum qilgan edi. Uning taʼkidlashicha, Rossiya neftni qayta ishlash zavodlariga qilingan hujumlar jahon bozorida dizel yoqilgʻisi va boshqa neft mahsulotlari tanqisligiga olib kelgan.
Kreml energetika sulhini «yaxshi gʻoya» deb atadi, biroq NQIZ xavfsiz ishlashini taʼminlash va neft mahsulotlari ishlab chiqarish hajmini oshirish taqchillikni bartaraf etishga yordam bermasligini taʼkidladi.
«Asosiy muammo neft mahsulotlarini jahon bozorlariga olib chiqish bilan bogʻliq» - dedi Rossiya prezidenti matbuot kotibi Dmitriy Peskov. Uning aniqlik kiritishicha, gap Ukrainaning tankerlarga bergan zarbalari va xalqaro sanksiyalar haqida bormoqda.
