Jeykob Stouks bu haqda 2026-yil 27-avgustda eʼlon qilingan Superpowers and AGI hisobotida yozgan. Hujjat AQSH va Xitoy oʻrtasidagi raqobatga umumiy sunʼiy intellekt paydo boʻlishi qanday taʼsir koʻrsatishi mumkinligini tahlil qiladi.
Muallif hisobotda AGI qachon yoki umuman yaratilishini bashorat qilmayapti. Aksincha, tahlil uchun bunday texnologiya paydo boʻlishi yaqinlashgan yoki allaqachon mavjud boʻlgan shartli ssenariy qabul qilingan.
AGI deganda odatda turli vazifalarda inson darajasida ishlay oladigan umumiy sunʼiy intellekt tushuniladi. Biroq bunday tizimlarning qachon yaratilishi yoki ularga erishish mumkinligi borasida yagona ilmiy xulosa mavjud emas.
Stouks Xitoy AGIʼni birinchi boʻlib yaratgan ssenariyda AQSH oldida keskin choralarni koʻrib chiqish masalasi paydo boʻlishi mumkinligini yozadi. Bular qatoriga kiberhujumlar va sunʼiy intellekt tizimlari ishlashi uchun zarur hisoblash quvvatlari joylashgan data-markazlarga oddiy qurollar bilan zarba berish ssenariysi kiritilgan.
Muallif bunday harbiy harakat AQSH va Xitoy munosabatlarida keskin eskalatsiya xavfini keltirib chiqarishini ham qayd etadi. Shu bois hisobot bunday chorani amalga oshirishga chaqiriqdan koʻra, AGI paydo boʻlgan taqdirda siyosatchilar duch kelishi mumkin boʻlgan xavfli ssenariylarni oldindan tahlil qilishga qaratilgan.
Stouks hozirda CNASʼning Hind-Tinch okeani xavfsizligi dasturida katta ilmiy xodim va direktor oʻrinbosari hisoblanadi. U avval Jo Bayden AQSH vitse-prezidenti boʻlgan davrda Oq uyning milliy xavfsizlik apparatida ishlagan.
Hisobotda, shuningdek, AQSH yoki Xitoyning AGIʼni birinchi boʻlib yaratishi oʻz-oʻzidan geosiyosiy ustunlikni kafolatlamasligi taʼkidlangan. Muallifga koʻra, texnologik imkoniyatni iqtisodiy va siyosiy taʼsirga aylantirish uchun uni amalda samarali qoʻllay olish ham talab etiladi.
