Fargʻona viloyati Uchkoʻprik tumanida ovqatdan zaharlanishda gumon qilingan 31 kishi shifoxonaga yotqizildi. Bu haqda Oziq-ovqat mahsulotlari xavfsizligi qoʻmitasi xabar berdi.
Maʼlum qilinishicha, 17–18-sentabr kunlari Uchkoʻprik tumanida istiqomat qiluvchi fuqarolar holsizlik, koʻngil aynishi va ich ketishi kabi shikoyatlar bilan tuman tibbiyot birlashmasiga murojaat qilgan.
Dastlabki epidemiologik surishtiruv jarayonida murojaat qilgan fuqarolar Uchkoʻprik tumani Navroʻzshoh koʻchasida joylashgan fast-fud mahsulotlari tayyorlaydigan shoxobchalardan birida hot-dog va non-burger kabi mahsulotlarni isteʼmol qilgani aniqlangan.
Shifokorlar tomonidan bemorlarda ovqatdan zaharlanish holatiga gumon qilingan.
18-sentabr kuni soat 17:00 holatiga jami 37 nafar fuqaro tibbiy yordam soʻrab murojaat qilgan. Ularning 31 nafari shifoxonaga yotqizilgan.
«Hozirda bemorlarga malakali mutaxassislar tomonidan tibbiy yordam koʻrsatilmoqda. Holat yuzasidan epidemiologik surishtiruv ishlari davom ettirilmoqda. Gumondagi oziq-ovqat mahsulotlari hamda bemorlardan tekshiruv oʻtkazish uchun tegishli namunalar olingan va tegishli laboratoriyalarda tekshirilmoqda», – deyilgan xabarda.
Tadbirkorlik subekti faoliyati qonunchilikda belgilangan tartibda vaqtinchalik toʻxtatildi.
Holat boʻyicha qoʻshimcha axborot taqdim etilishi maʼlum qilingan.
