Yigʻilishda Qoraqalpogʻistonda 30 ming gektarda shoʻrga chidamli olxoʻri va kechki oʻrik plantatsiyalarini tashkil etish boʻyicha uch yillik dastur amalga oshirilishi taʼkidlandi. Yangi dastur doirasidagi 10 ming gektarda ishlar shu yil boshlanadi.
Viloyat hokimlari 500 va 1 ming gektardan bogʻ yaratishga masʼul boʻladi. Andijondan yer boʻyicha mutaxassis va dehqonlar kelib, Kegeylida ishlarni boshlagani qayd etildi.
Qoraqalpogʻiston Vazirlar Kengashi, viloyat hokimlari va Bogʻdorchilik agentligi oʻrtasida uch tomonlama shartnomalar tuziladi. Ikki haftada har bir viloyat uchun yer ajratilib, kafolatli suv taʼminoti yaratiladi. Agentlik 1-oktabrgacha iqlimga mos koʻchat navlari va ekish texnologiyalarini taqdim etadi.
Viloyat hokimlari usta dehqon va agronomlarni jalb qilib, ularga uy-joy qurib beradi. Har bir hududda 50 gektardan bogʻ joriy yil, qolgan maydonlarda bahorda barpo etiladi. Qayta ishlash quvvatlari ham shu yerning oʻzida tashkil qilinadi.
Davlat rahbari tomonidan bogʻdorchilikda 20 ming odamni ishli qilish va uch yilda meva eksportini kamida 500 million dollarga yetkazish vazifasi qoʻyildi.
Shuningdek, kelgusi bahordan Nukus tumanidagi 10 ming gektar maydonda qovun yetishtirish boshlanadi. Yil yakunigacha Ispaniya, AQSH, Niderlandiya va Xitoydan qovunning eng yaxshi navlari, urugʻchilik va agrotexnologiya boʻyicha mutaxassislarni olib kelish topshirildi.
Salohiyatli investorlarni jalb qilib, shu yerning oʻzida qovunni qayta ishlash va eksport qilish bilan shugʻullanadigan xolding tashkil etiladi.
Nukus tumanidagi texnikum qovunchilikka moslashtirilib, laboratoriya va sinov poligoni bilan taʼminlanadi. Ushbu muassasa Qoraqalpogʻiston, Xorazm, Jizzax, Qashqadaryo va Sirdaryodagi qovun yetishtiruvchilar uchun tajriba almashish metodik markazi boʻladi.
