Naked Science nashrining Global Times maʼlumotlariga tayanib yozishicha, stansiya Xitoyning janubi-gʻarbidagi Sichuan provinsiyasi, Garze-Tibet avtonom okrugining Yatszyan uyezdida joylashgan. Uning oʻrnatilgan quvvati 3 000 megavattni tashkil etadi.
Lyanxekou GES Xitoyning 2016–2020-yillarga moʻljallangan 13-besh yillik rejasidagi asosiy loyihalar qatoriga kiritilgan. Stansiya Yalun daryosidagi GES kaskadida suv oqimini tartibga solishda muhim oʻrin tutadi.
303 metrlik toʻgʻon
GES qurilishi 2014-yilda boshlangan, 2024-yilda esa qurilish yakunlari boʻyicha qabuldan oʻtkazilgan.
Shagʻal-grunt oʻzakli tosh toʻkma toʻgʻonning balandligi 303 metrga yetadi. U Ginness rekordlar kitobi tomonidan dunyodagi eng baland tosh toʻkma toʻgʻon sifatida tasdiqlangan.
Stansiya dengiz sathidan oʻrtacha 3 000 metr balandlikda, grunt mavsumiy muzlaydigan hududda qurilgan. Murakkab tabiiy sharoit sababli quruvchilar yil davomida atigi 200 kun atrofida samarali ish olib borish imkoniga ega boʻlgan.
Tik yonbagʻirlar, togʻ jinslari massividagi yuqori tabiiy kuchlanish sharoitida yerosti mashina zalini barpo etish, shuningdek, sovuq va baland togʻ sharoitida oʻta baland toʻgʻon qurish qoʻshimcha qiyinchiliklar tugʻdirgan.
Loyihada 11 ta jahon rekordi oʻrnatilgan
Qurilish davomida oʻta baland tosh toʻkma toʻgʻonni intellektual texnologiyalar yordamida barpo etish, qishda ishlarni davom ettirish hamda katta bosim va yuqori tezlikdagi suv oqimiga moʻljallangan suv tashlash inshootlarini loyihalash bilan bogʻliq texnik vazifalar hal qilingan.
Manbada keltirilishicha, loyiha doirasida jami 11 ta jahon rekordi oʻrnatilgan. Qurilishning barcha bosqichlarida intellektual texnologiyalardan keng foydalanilgan.
Lyanxekou GES yiliga qariyb 11 milliard kilovatt-soat elektr energiyasi ishlab chiqaradi.
