DW xabariga koʻra, Moldova bosh vaziri Vasile Tofan qish arafasida uchta mintaqaviy inqiroz bir vaqtda taʼsir koʻrsatib, vaziyatni ogʻirlashtirishi mumkinligini bildirgan.
Uning aytishicha, Hoʻrmuz boʻgʻozidagi vaziyat tufayli gaz narxi amaldagi tarif hisob-kitobiga kiritilgan qiymatdan 50 foizga oshib ketgan. Yaqin Sharqda neft qayta ishlash quvvatlarining qisqarishi esa yonilgʻi taqchilligi xavfini kuchaytirmoqda. Moldova bunday muammoga joriy yil iyul oyida ham duch kelgan.
Shu bilan birga, 700 ming aholi yashaydigan Kishinyov aglomeratsiyasini suv bilan taʼminlovchi Dnestr havzasida suv sathi xavfli darajaga tushgan.
Favqulodda holat qanday vakolatlar beradi?
Hukumat qaroridan oldin, 21-sentabr kuni prezident Mayya Sandu raisligida Oliy milliy xavfsizlik kengashi yigʻilishi oʻtkazilgan. Unda kutilmagan vaziyatlarda tezkor harakat qilish uchun choralar rejasini tayyorlash topshirilgan.
Favqulodda holat Inqirozlarni boshqarish milliy komissiyasiga uskunalarni tendersiz tezkor xarid qilish, energiya resurslari importi, eksporti va taqsimoti boʻyicha bajarilishi majburiy boʻlgan vaqtinchalik qarorlar qabul qilish huquqini beradi.
Komissiya elektr taʼminotida ustuvor yoʻnalishlarni belgilashi va suv isteʼmolini cheklashi mumkin. Narxlar keskin oshsa, tariflar, soliqlar va aksizlarga oid qoidalarni vaqtincha oʻzgartirish vakolati ham berilgan.
Muxolifat Rossiya bilan muzokaralarni taklif qildi
Rossiyaga moyil muxolifatdagi Sotsialistlar partiyasi favqulodda holatga qarshi chiqqan. Partiya fraksiyasi rahbari, sobiq prezident Igor Dodon hukumatni ushbu rejim orqali maxfiy shartnomalar tuzish va shaffof boʻlmagan sxemalarni amalga oshirishga urinishda ayblagan.
Nashrning yozishicha, favqulodda holat davrida partiya avvalroq eʼlon qilgan norozilik namoyishlarini oʻtkazish ham taqiqlanadi. Sotsialistlar muqobil energiya yetkazib beruvchilar, avvalo, Rossiya bilan zudlik bilan muzokara boshlashni taklif qilgan.
Energetika eksperti Sergey Tofilat bu taklifni populizm deb baholagan. Uning fikricha, «Gazprom»ning Moldovaga gaz yetkazib berish uchun texnik imkoniyati yoʻq: amaldagi yagona real yoʻnalish - «Turk oqimi» quvvatlari mavjud shartnomalar bilan toʻliq band.
