DXX Fargʻona viloyati boʻyicha boshqarmasi xodimlari viloyat Ichki ishlar va Bojxona boshqarmalari bilan hamkorlikda «Fargʻona - Toshkent» yoʻnalishida harakatlanayotgan «Kobalt»ni Pop tumanidagi «Namangan» YPX maskanida toʻxtatgan.
Tekshiruvda Chirchiq shahrida yashovchi, 1995-yilda tugʻilgan fuqaro boshqaruvidagi avtomashina yukxonasiga bir kilogramm gashish yashirilgani aniqlangan. Modda ashyoviy dalil sifatida olingan.
DXX Namangan viloyati boʻyicha boshqarmasi, ichki ishlar va bojxona organlari hamkorligida Chust tumanida oʻtkazilgan boshqa tadbirda «VAZ-2103» avtomashinasi koʻzdan kechirilgan. Yangi Namangan tumanida yashovchi, 1987-yilda tugʻilgan, muqaddam sudlangan shaxsga tegishli avtomobilning salonidan 995 gramm gashish topilgan.
Yana bir holatda Namangan shahrida istiqomat qiluvchi, 1975-yilda tugʻilgan fuqaroning xonadoni xolislar ishtirokida tekshirilgan. Uyning yertoʻlasidan 648 gramm gashish olingan.
Xabarda qayd etilishicha, xonadon egasi ushbu giyohvandlik vositasini Yangi Namangan tumanida yashovchi, 1972-yilda tugʻilgan tanishidan 5 ming AQSH dollariga sotib olgani aniqlangan. Uni sotganlikda gumon qilinayotgan shaxs ham protsessual tartibda ushlangan.
Holatlar yuzasidan jinoyat ishlari qoʻzgʻatilgan. Hozirda tergov harakatlari olib borilmoqda.
